ISundowns igwaze ibhece yaqukula ubutsetse beBetway
ABADLALI beMamelodi Sundowns bejabulela elinye lamagoli okuwine ngawo leli qembu kwiMagesi FC izolo ebusuku
Image: BACKPAGEPIX
Mamelodi Sundowns (2) 2
Magesi FC (0) 0
UMBUZO ngokubukeka kwenkomishi yokuqala yeBetway Premiership olokhu wahlala ezingqondweni zabathandi bakanobhutshuzwayo waseNingizimu Afrika kusukela ngoSepthemba nyakenye, uphendulekile izolo, ngesikhathi i-Premier Soccer League (PSL) iklomelisa ompetha beligi iMamelodi Sundowns.
Lokhu kwenzeke ngesikhathi iSundowns isonga isicoco sayo sehlandla lesishiyagalombili kulandelana ngokunqoba kwiMagesi FC ngamagoli amabili kaLucas Ribeiro awashaye esiwombeni sokuqala eLoftus Versveld, ePitoli.
Kusukela kwamenyezelwa iBetway njegabaxhasi ababengena esikhundleni sabakwaDStv Premiership ngonyaka odlule, awukaze unyamalale umbuzo othi "iphi inkomishi?" kubalandeli.
Ngaphandle kokuthi inkomishi ibididiyelwa nguNelson Makamo odume emkhakheni wezemfashini, usihlalo we-PSL, u-Irvin Khoza ubephendula ngendlela eyodwa ethi "akulindwe" njalo uma lo mbuzo ubhekiswe kuyena.
Izolo, uhlale ubala umsebenzi kaMakamo ogqize ngegolide nesiliva okuphelezelwa wumlando webhola laseNingizimu Afrika kusukela ngezikhathi zobandlululo.
ISundowns ayigcinanga ngokuba yiqembu lokuqala ukubeka izandla zalo kule nkomishi kodwa iqophe omunye umlando ngokuba yiqembu lokuqala ebholeni laseMzansi ukuba nabadlali abathathu abalandelanayo embangweni womgadli obahlule bonke ngokuhlohlwa kwamagoli.
Omunye walaba badlali (uRibeiro) ubeseyibhakuzise amahlandla amabili inethi ngesikhathi kuyiwa ekhefini. Lokhu kumbeka kumagaoli angu-16 kwiligi, kulandele u-Iqraam Rayners ngawu-14, bese kuthi uSales alale isithathu lapho ebambene khona noDzenan Zajmovic we-TS Galaxy ngayisishiyagalombili.
Lo mphumela ubika ukuthi iSundowns idle isicoco ngamaphuzu angu-73 ngemuva kwemidlalo yeligi engu-28, yashaya amagoli angu-65 okuyirekhodi elisha kusukela kwaqala i-PSL ngo-1996.
Nakuba uRayners ekhishiwe kodwa ube nesandla ekwakheleni uRibeiro igoli lakhe lokuqala. Nemizamo kaSales ibigqamile kodwa lagcina ngokumphika igoli.
Njengoba iSundowns egoduke nesheke lika-R20 million isisongile ngalesi sicoco obese kunesikhathi kwaziwa ukuthi izosivikela isigxila kwiCaf Champions League.
Izokwamukela iPyramids FC yase-Egypt kowomlenze wokuqala bese isonga lo mqhudelano ekuhambeni ngoJuni 1, ngaphambi kokubhekisa amabombo kwiFifa Club World Cup eqala ngoJuni 15, e-United States of America (USA).