SITHEMBISO MKHIZE
Orlando Pirates (0) 0
Mamelodi Sundowns (0) 3
IMAMELODI Sundowns esathungatha isicoco sokuqala kule sizini, izehlisele umthwalo ngesikhathi ishaya i-Orlando Pirates ngo-3-0, emdlalweni weDStv Premiership obuyizolo, e-Orlando Stadium.
Ukunqoba kwayo kubuyise amathemba okuvikela inkomishi yeligi amahlandla amane kulandelana. Amagoli ayibuyisele esicongweni, kube yiphenathi evalelwe phakathi nguRicardo Nascimento ngomzuzu ka-58.
UShalulile ukhahlele ishodi elishaye esandleni sika-Innocent Maela, wangacucuza unondweba, uLuxolo Badi wayibeka emlotheni.
Elesibili linamathiselwe nguShalulile ngoka-76. Kube yiphutha likakaputeni weZimnyama uThulani Hlatshwayo, ophucwe ibhola yilo mgadli waseNamibia, ngaphandle nje kancane kwebhokisi.
Elesithathu kube yingcwenga ye-free kick kaLyle Lakay, obesuka ebhentshini ngoka-80. UNtsikelelo Nyauza udlalise kabi uGift Motupa ngaphandle kwebhokisi lePirates.
Akubuzwa ukuthi lokhu kunqoba kakwehlanga kahle kumqeqeshi waMaZulu, uBenni McCarthy olibeke ngembaba ngaphambi komdlalo wayizolo, ukuthi ufuna kunqobe eZimnyama.
ISundowns igudluze AmaZulu abenyukele esicongweni ngamaphuzu awu-50 kulandela unqoba iLamontville Golden Arrows ngo 1-0 ngoMgqibelo. EZimnyama zizoqhubeka nokuhlala kweyesihlanu ngamaphuzu awu-39, emidlalweni ewu-24.
Kwisizini ka-2020/21 iSundowns iyiphendule ithofi layo iPirates.
Emasontweni edlule ishaywe iSundowns ngo-4-1 koweNedbank Cup, kanti nasemlenzeni wokuqala weDStv Premiership yakhala ngaphansi ngegoli elilodwa.
Isiwombe sokuqala siqale siyindikindiki, nokho kuyiSundowns ebizama ukufika ezintini zikaWayne Sandilands. Ngasekuqaleni kwalesi siwombe bekubhoke uKermith Erasmus, obezama ukukhahlelela uSandilands.
Isisu seZimnyama ebesakhiwe nguSiphesihle Ndlovu, Fortune Makaringe, Abel Mabaso, Ben Motshwari noPaseka Mako siqale salala. Emizuzwini ewu-15 zibheke ekhefini, iPirates ivukile emaqandeni. Kwesokunxele nakwesokudla uMako noNdlovu baqalile bashoshela phambili, begoba amabhola ezinhlangothini.
Nasesiswini uMotshwari noMabaso baqalile ukuphasa amabhola abheke ezintini zikaDanis Onyango.
Kwesesibili iPirates ibuye ngamandla, uMako engayizwa iSundowns. Ubebambisene noDeon Hotto noVincent Pule ogcine ephumile ngenxa yokulimala. Ngemuva kwegoli lokuqala eZimnyama zizamile ukubuya. Ngabe kukhulunywa okunye okube uMako akalifuqanga ibhola ngomzuzu ka-62, esesebhokisini leSundowns.
Abafana baseChloorkop babuye ngamandla, angena elandelana amagoli. Womabili amaqembu aye kulo mdlalo izinto zingawahambeli kahle. Sekuphele imidlalo emine iBucs ihluleka ukunqoba. Idlale ngokulingana ne-ES Setif koweCaf Confederation Cup nakoweSwallows kwiligi. Kodlule beyishaywe i-Enyimba yaseNigeria.
Kubafana baseChloorkop, bese kuphele emine behluleka ukunqoba. NgoLwesithathu ngo-3 ntambama eLoftus Stadium, iSundowns, izokwamukela iMaritzburg United elwela ukusuka kumaqembu asemsileni.
Ngosuku olufanayo eZimnyama zizovakashelwa yiBlack Leopards esemsileni. Lo mdlalo uqala ngo-5 ntambama khona e-Orlando Stadium.
Imiphumela yangempelasonto yeGladAfrica Championship:
Cape Umoya 1-0 JDR Stars; Steenberg United 1-2 Royal AM; Sekhukhune United 0-0 Uthongathi; Polokwane City 1-0 Cape Town Spurs; Richards Bay 3-2 University of Pretoria
Imiphumela yangempelasonto yeDStv Premiership:
Maritzburg United 1-1 Swallows; Chippa United 1-0 Stellenbosch; TS Galaxy 1-0 Cape Town City; Lamontville Golden Arrows 0-1 AmaZulu; Bloemfontein Celtic 2-2 Kaizer Chiefs; Tshakhuma 1-2 Black Leopards; SuperSport United 1-1 Baroka FC; Orlando Pirates 0-3 Mamelodi Sundowns.