LUNGILE MAJOKA
KUSANZIMA ukuthola iqembu elizonqanda iMamelodi Sundowns endleleni yayo ebheke ekuvikeleni isicoco seDStv Premiership njengoba iqhubekile nokucoboshisa izitha emdlalweni weligi ngoMsombuluko.
ISundowns iqoqe amaphuzu amathathu ithela phansi iChippa Unitedn ngo 2-1 eSisa Dukashe Stadium, eMdantsane.
Lo mphumela welule igebe leSundowns labuyela kumaphuzu ayisithupha njengoba isinawu-46 esicongweni, bese ilandelwa AmaZulu FC anamaphuzu awu-40.
Ngokunqoba amaBrazilians abuye aqopha irekhodi elisha kwiPremiership ngokuqhuba imidlalo ewu-20 engayazi induku kwiligi. lrekhodi ebelikhona elabekwa yiKaizer Chiefs ngo-2014/2015 eyadlala imidlalo ewu-19 ingayazi induku.
Amagoli enqobe ngawo iSundowns yiphenathi ebekwe uThemba Zwane esiwombeni sokuqala ngemuva kokudlaliswa kwabi kuka-Aubrey Modiba ebhokisini.
UZwane ubengaphuma namagoli angaphezulu kwelilodwa kulo mdlalo kodwa kwangalunga njengoba elinye lawo lishaye ipali eseqedile ngonozinti weChippa uRashid Watenga.
Ngemuva kwalo u-Augustine Kwem wabeka phakathi eleChippa lokulinganisa.
Ngaleso sikhathi iChilli Boyz ibisithanda ukuba yingozi odongeni lweSundowns kodwa yagcina ngokuhluleka wukudlula kuDenis Onyango.
Eminye iminyakazo yeSundowns ebilokhu iyenza idle ngamaphasi amafushane igcine ithelile, uPeter Shalulile evalela phakathi igoli lesibili kade sekunesibhudubhudu ebhokisini.
Ngesikhathi amaphuzu amathathu esho injabulo nokuhlala esicongweni kwiSundowns, ukungatholi lutho kwiChippa kusho ukuthi isanamathele endaweni yesibili ukusuka emsileni ngamaphuzu awu-17. Le ndawo ayiyinhle njengoba iqembu eliqede lapha lidlala kweyokuhlunga lilelwe ukuhlala esigabeni esikhulu, namaqembu amabili azobe esuka kwiGladAfrica Championship.