Isiqalile ukushosholoza inqola yeSundowns

Mamelodi Sundowns (0) 3

TS Galaxy (0) 0

I-MAMELODI Sundowns ikhombise izimpawu zokuthi izophinde izidlele amahlanga kwiDStv Premiership ngeSonto ebusuku, ngesikhathi ibhaxabula iTS Galaxy emdlalweni weligi eLoftus Versfeld Stadium, eTshwane.

Amagoli eSundowns ashaywe nguMosa Lebusa, Peter Shalulile, noThabiso Kutumela esiwombeni sesibili.

Ukuqoqa amaphuzu amathathu kweSundowns, kuyibeke esicongweni selog ngamaphuzu ayishumi emuva kwemidlalo emine yePremiership.

Ngesizini edlule, iSundowns ihlale esicongweni selog zibekwa, yagcina iwine iligi. Yehlulwe yiKaizer Chiefs kuphela emidlalweni engu-30. Ivukela iGalaxy nje, ibuya ekutheleni induku kwiKaizer Chiefs emdlalweni odlule.

Ukuwina kwayo, ijikela esiswini iGalaxy obekubukeka sengathi ineqhinga lokuyivimba, kucacisile ukuthi nakule sizini kuzoba nzima ukuyephuca isicoco seligi emaqenjini azimisile ukuvukela umbuso wayo ebholeni laseMzansi.

ISundowns isiwine iligi amahlandla amane kulandelana. Isinqobe izicoco eziyishumi zeligi emlandweni wePremiere Soccer League.

IGalaxy iqale umdlalo ngendlela engalindelekile, yahlasela zibekwa okuyinto engajwayelekile kumqeqeshi wayo u-Owen Da Gama, uma edlala namaqembu amakhulu. Ukuhlasela kweGalaxy kuyithwese ubunzima iSundowns ebingafuni lutho emuva.

ISundowns nayo kade ifika phambili kodwa yehluleka ukusebenzisa amathuba. Ithuba leSundowns eliphakamise amaphaphu liqhamuke ngomzuzu ka-39 ngesikhathi unozinti weGalaxy, uVasilije Kolak echithela enkundleni ishodi likaKermit Erasmus kodwa lamehlula uThemba Zwane ukulivalela phakathi.

Esiwombeni sesibili iSundowns ibuye ngamandla kodwa wenqaba uKolak ezintini zeGalaxy. Nokho agcine evulekile amasango ngomzuzu ka-57 ngesikhathi uLebusa evalela phakathi ibhola elichilizelwe enkundleni nguKolak kukade kuyi-free kick eshaywe nguLayle Lakay.

Emuva komzuzu, uShalulile ushiye izitobha zeGalaxy eyovalela phakathi ibhola elide elishaywe ngu-Andile Jali. Ngomzuzu ka-84 uKutumela uqede wonke amathemba eshayela isipikili sokugcina.

Lo mphumela usho ukuthi iGalaxy ibuyela ekhaya izikhotha amanxeba, izibuza iziphendula ukuthi kumele yenze njani ukuze ithole amaphuzu ayo okokuqala agcwele kule sizini. Iqembu likaDa Gama alikanqobi kule midlalo emine esigijinyiwe. Isaqoqe amaphuzu amabili.

Umdlalo wayo olandelayo ungeSonto lapho izovakashela iRoyal AM ebhaxabule iKaizer Chiefs ngo 4-1.

ISundowns yona izongena enkundleni ne-Orlando Pirates ngoMgqibelo e-Orlando Stadium ngo-3 ntambama.

Imiphumela yeDStv Premiership:

Baroka 1-0 Sekhukhune United; Cape Town City 0-3 Stellenbosch FC; Kaizer Chiefs 1-4 Royal AM; Chippa United 1-3 Orlando Pirates; Swallows 0-3 SuperSport United; Mamelodi Sundowns 3-0 TS Galaxy.

Imiphumela yeGladAfrica Championship:

Venda Football Academy 0-0 Polokwane City; Pretoria Callies 0-0 Free State Stars; Hungry Lions 2-1 Jomo Cosmos; TS Sporting 0-0 University of Pretoria; TTM 0-0 Platinum City Rovers; JDR 0-1 Cape Town All Stars; Cape Town Spurs 0-1 Uthongathi; Richards Bay 0-2 Black Leopards.