Isiheha nabamaligi amakhulu Isolezwe Soccer Cup
KUSUKELA kwesokunxele, uZama Buthelezi weSafa Ethekwini, Thandeka Mthembu, Khwezi Ndlovu (Hashtag Solutions), Luyanda Ngcobo noMluleki Mlambisa emcimbini wokwethulwa ngokusemthethweni kweSolezwe Cup
Image: TUMI PAKKIES
UKUKHULA kwe-Isolezwe Soccer Cup ezinhliziyweni zabathandi bakanobhutshuzwayo emazingeni aphansi kuphinde kwahlala obala njengoba bezibulalana kwabesilisa zibanga indawo kuma-quarterfinal alo mqhudelwano ngempelasonto ezinkundleni ezahlukene eThekwini.
Imidlalo ebiseqophelweni eliphezulu eTills Cresent, eThekwini, ngempelasonto edlule, igcine ngokukhipha amaqembu ayisishiyagalombili azobanga indawo ebekelwe umpetha ka-2025 kusukela ngoMgqibelo kuze kube yiSonto, e-SJ Smith, eWema.
Amaqembu ayisishiyagalombili adlulele kweyaseWema yiFalcons FC, Ethekwini Coastal, Cherrians FC, Umbumbulu Academy, Bizana FC, Durban Spurs FC, Mayville Classic neClermont Warriors.
Ukukhula mawala kwe -Isolezwe Cup kugqame enkulumweni kaZama Buthelezi, oyisikhulu esiphezulu esifundeni saseThekwini seSouth African Football Association (Safa), ngemuva kokusongwa kweyangempelasonto edlule.
“Iqophelo lebhola elisibone ngempelasonto edlule kulo mqhudelwano alihluke ngalutho kwesijwayele ukulibona emiqhudelwaneni ethathwa njengemikhulu kuneSolezwe Cup,” kusho uButhelezi.
“Konke lokhu kuwubufakazi bokuzinikela kwawo wonke umuntu othintekayo ekuhlelweni kweSolezwe Cup. Akulula ukuziba ukukhula nokudlondlobala kwalo mqhudelwano."
Emaqenjini azobhekana kuma-quarterfinal, kukhona elidlala kwi-ABC Motsepe League, amathathu adlala kuSuper League, amabili agijima kuZonal League bese kuba amanye amabili adlala ngaphansi kwamaLocal Football Association (Safa).
Ukubalwa kwiSolezwe Cup kwamaqembu adlala kumaligi aseduze nomnyango webhola elikhokhelayo, kuwubufakazi bokuthi lo mqhudelwano ukhula ngesivivi uma uzokhumbula ukuthi wawuqalwe ngo-2022, ngenhloso yokubhiyozela ukuqeda kweSolezwe iminyaka engu-20 liphakela abafundi balo izindaba.
Imidlalo yebhola labesifazane ngoMgqibelo imi kanje;
Babhambe v Msasa Ladies
UMlazi Y Lions v Toti Ladies
MI Future Ladies v Adams Academy