KWENZEKE okungajwayelekile ebholeni laseNingizimu Afrika ngesikhathi iSouth African Football Association (Safa) imisa emsebenzini unondweba nobesizana naye bebeka iphenathi esolisayo emdlalweni weDStv Premiership phakathi kwaMaZulu neKaizer Chiefs ngempelasonto edlule.
UJelly Chavani obedlalisa noMoeketsi Molelekoa obengunompempe wesine, bahlanganisa amakhanda babeka iphenathi usoyophela lo mdlalo obuseJonsson King’s Park Stadium, eThekwini ngoMgqibelo odlule.
Le inike iChiefs ithuba lokulinganisa, umdlalo waphela ngo 1-1 ngemuva kokuthi uKeagan Dolly eyibeke phakathi.
ISafa ikhiphe isitatimende ngoLwesithathu ntambamba iqinisekisa ukumiswa kukaChavani noMolelekoa.
Ngokwalesi sistatimende, leli komidi lihlangane ngoMsombuluko ukuzobhunga ngendlela labo nondweba abawulawule ngayo umdlalo.
“UJelly Chavani nobemsiza ngaphandle kwenkundla, uMoeketsi Molelekoa bobabili batholakale besephutheni lokuhluleka ukwenza umsebenzi wabo ngendlela elindelekile kubona, ngakho-ke bazomiswa amasonto ayisithupha ukudlalisa emidlalweni yeGladAfrica Championship neyeDStv Premiership,” sibhalwe kanje isitatimende.
“Kumasonto ayisithupha alandelayo kunethimba elizobe libabheke ngeso lokhozi labo nondweba ngenhloso yokuqinisekisa ukuthi bayahlunyeleliswa ukuqinisekisa ukuthi isimo esifuze lesi ngeke siphinde sivele.”
Leli komidi libe selixwayisa labo nondweba ukuthi uma beqhubeka nokuhlulwa umsebenzi, lizophoqeleka ukuthi lithathe izinqumo ezinzima kunalezi ngokuzayo.
“ISafa izoqhubeka nokulindela iqophelo elincomekayo ngaso sonke isikhathi konondweba bayo. Ithemba ukuthi lokhu kuzokwenza onondweba bazi ukuthi uma benza amaphutha kuzoba nezinyathelo ezinqala ezithathwayo,” kuqhuba isitatimende seSafa.
Leli komidi elibheke ukusebenza konondweba likubalulile ukuthi likuqaphelile ukuthi lokhu kwenzeke ngomzuzu ka-93.
Lithe, onondweba abathintekayo abazange baziphathe ngendlela elindelekile kubona ikakhulukazi kokuthinta ukubekwa kwephenathi.
Bobabili abazange bayilandele imithetho kanobhutshuwayo ikakhulukazi, le mithetho ekhuluma ngebhola elithinta esandleni.
Ngenxa yalokhu: Umphumela womdlalo waMaZulu neChiefs ube yiphutha ngakho-ke, AmaZulu awazange abuthole ubulungiswa ngenxa yesinqumo sale phenathi.
UChavani akaqali ukumiswa njengoba nengesizini edlule wamiswa amasonto amane esolwa ngokuhluleka wukubeka iphenathi ye-Orlando Pirates eyayidlala neSwallows FC.