IPSL imemezele umqhudelwano omusha
U-IRVIN Khoza usihlalo wePremier Soccer League noMarc Jury isikhulu esiphezulu kwaSuperSport ngesikhathi kwethulwa umqhudelwano omusha iDStv Compact Cup ngoMsombuluko emahhovisi ePSL eGoli Isithombe: BACKPAGEPIX
XOLILE MPISANE
IPREMIER Soccer League (PSL) isimemezele umqhudelwano omusha, iDStv Compact Cup, ozodlalwa ngoJanuwari wonyaka ozayo.
Lo mqhudelwano ozosebenzisa uhlelo olungakaze lubonakale kuleli, uzoqala ngoJanuwari 22 uphele ngoJanuwari 29. Izinkundla okuzodlalelwa kuzona nezikhathi zizomenyezelwa ngokuhamba kwesikhathi.
Lo mqhudelwano uzobangwa izikwati ezine ezizobe zihlanganise abadlali bamaqembu ehlukene agijima kwiDStv Premiership.
Iqembu leCoastal 1 lizohlanganisa abadlali baMaZulu, Lamontville Golden Arrows, Royal AM neMaritzburg United. Abadlali abavela kwiChippa United, Cape Town City, Stellenbosch FC kanye neBaroka bazokwakha iqembu leCostal 2.
Abadlali bamaqembu aseSoweto, iKaizer Chiefs, i-Orlando Pirates neSwallows, bazohlanganiswa nabeTS Galaxy ukwakha iqembu le-Inland 1. Iqembu le-Inland 2 lizobunjwa ngabadlali beMamelodi Sundowns, SuperSport United, Sekhukhune United neMarumo Gallants.
Bonke abadlali abangeke babambe iqhaza kwi-Africa Cup of Nations ezobe iseCameroon ngoJanuwari bazoba sethubeni lokuqokwa.
Uma sezikhethiwe izikwati, ezizoqokwa abalandeli, kuzoqalwa ngemidlalo eyandulela owamanqamu emibili ngoJanuwari 22. Amaqembu azonqoba azobe esedudulana kowamanqamu ngoJanuwari 29 kuthi lawo ahluliwe abange indawo yesithathu ngosuku olufanayo.
“Ngithanda ukubonga iSuperSport, DStv neMultiChoice ngokuba ngabalingani abakhethekile abasilekelela njalo ekukhuliseni umdlalo webhola kanye nokuthuthukisa umkhiqizo esiwunikeza abalandeli bethu,” kusho uSihlalo wePSL, u-Irvin Khoza kwisithangami nabezindaba ngoMsombuluko.
"Ngiyaziqhenya ngalesi sivumelwano, ikakhulukazi kulezi zikhathi ezinzima ze-Covid, lapho sizwa khona ukuthi ukhwantalala selugasele emindenini eminingi. Akwaziwa ukuthi lizobhebhetheka kuze kube nini leli gciwane.
“Kubaluleke kakhulu ukuthi sisungule izinto ezintsha ukuze abantu bathole ukukhululeka kancane ngokomqondo. Kuyasiza uma kunento entsha okuxoxwa ngayo.
"Enye yezinto ezibalulekile kuleli bhizinisi lethu lebhola ukudala izingxoxo. Ngakho-ke sibone kubaluleke kakhulu ukuthi sakhe lo mqhudelwano ozokwenza abalandeli babe nento abazokhuluma ngayo."
Iqembu ngalinye kulawa amane lizoba nabadlali abangu-26, onozinti ababili, abadlali basemuva abayisishiyagalombili, ababasesiswini abane, abagadli abane, nabadlali abasebancane abane abazothathwa emaqenjini eDiski Challenge.
Iqembu ngalinye kwawe-DStv Premiership kufanele limelwe ngabadlali abahlanu, abane abaqhamuka esikwatini esikhulu, noyedwa ophuma kwiDiski Challenge.
Abaqeqeshi namaphini abo nabo bazovotelwa ngabalandeli.
Iqembu elizodla umhlanganiso lizoklonyeliswa ngo-R1 million, kanjalo nomlandeli onenhlanhla ozoqokwa kulaba abazovota. Eminye imininingwane mayelana nezindlela zokuvota isazomenyezelwa.