Orlando Pirates (0) 0
Al Ahly Tripoli (0) 1
I-ORLANDO Pirates izibeke ethubeni Iokuqeda ukhondolo ingena kowamanqamu weCaf Confederation Cup phezu kokwehlulwa emlenzeni wesibili kowandulela owamanqamu walo mqhudelwano odlalelwe e-Orlando Stadium, eSoweto, ngeSonto ebusuku.
EZimnyama zikhale ngaphansi ngo 1-0 wegoli lika-Ali Abu Arqoub elingene umdlalo usuya ekupheleni. Nokho zigcine zidlula ngo 2-1 uma sekuhlanganiswa imiphumela yemilenze yomibili.
IPirates, ewine ngo 2-0 kowokuqala eLibya ngesonto eledlule, ingene enkundleni idinga ukugwema ukungenelwa ngamagoli angaphezu kwamabili ngakuyona ukuze izibeke ethubeni lokuqeda ukhondolo lweminyaka lokwehlulwa kowamanqamu emiqhudelwaneni yeCaf.
IPirates idlale kowamanqamu weCaf Champions League ngo-2013 kodwa yakhala ngaphansi kwi-Al Ahly yase-Egypt. Ngo-2015 yehlulwe yi-Etoile du Sahel yaseMorocco kowamanqamu weConfederation Cup. EZimnyama zagcina ukuwina umqhudelwano weCaf ngo-1995 zihlabana ngeChampions League.
Kowamanqamu, ozoba seGodswill Akpabio International Stadium, e-Uyo, eNigeria, ngoLwesihlanu, iPirates izobhekana neqembu eliwine phakathi kweTP Mazembe yaseDemocratic Republic of Congo (DRC) neRSB Berkane yaseMorocco esilobe besazodlala owomlenze wesibili. IMazembe ingene enkundleni ihamba phambili ngo 1-0 wegoli elishaye ekhaya kowomlenze wokuqala.
Enkundleni, iPirates iqale ngegiya eliphezulu ifuna ukushaya igoli umdlalo usanda kuqala. Nokho iTripoli iyona ebuze kuqala kunozinti weBucs, uRichard Ofori ngomzuzu wesibili kodwa ibhola laphuma eceleni kwepali. Kwenyuke amaphaphu kubalandeli bePirates ngomzuzu ka-16, ngesikhathi unompempe waseGambia, uBakary Gassama, eyikhomba emlotheni emuva kokuthi uHappy Jele ebambe ibhola ngesandla ebhokisini kodwa wabuye wasishintsha isinqumo emuva kokubheka i-VAR. Emuva kwalokho iTripoli ibuye ngamandla, yabuya iphindelela ezintini zePirates kodwa wenqaba u-Ofori.
Esiwombeni sesibili, iPirates ibuye isilenyusile igiya kodwa ihluleka uma isifike phambili. Ngokuhamba kwesikhathi inqume ukugcina ibhola, yadlala ngokukhululeka. Lokhu kubukeke kuwuqeda umfutho kubadlali beTripoli. Ngomzuzu ka-89, u-Arqoub ushaye ishodi engaphandle kwebhokisi, wasala enkemile u-Ofori.