I-ORLANDO Pirates izicabele indlela ebheke kuma-quarterfinal eCAF Confederation Cup ihlula i-Al Ahly Benghazi yaseLibya emdlalweni wamaqoqo kaGroup A e-Orlando Stadium, eSoweto, izolo ebusuku.
Amagoli abeke iPirates ebuhleni ashaywe nguNtsikelelo Nyauza, Tshegofatso Mabasa noKabelo Dlamini esiwombeni ngasinye. Ngokunqoba izolo, iPirates izibeke esicongweni okwesikhashana ngamaphuzu ayisishiyagalombili. Umbuso wayo ubukade uncike emphumeleni womdlalo obuphakathi kwe-Enyimba yaseNigeria ne-ES Setif yase-Algeria esishicilele uzodlala ngo-9 ebusuku.
Ngaphambi kwemidlalo yayizolo, i-Enyimba yiyona ebikade izihola phambili kuGroup A. Amaqembu amabili azoqeda phezulu azodlulela kuma-quarterfinal.
Emdlalweni wayizolo wePirates neBenghazi, ziqale ziphuthumana nhlangothi zombili. Ukuxhamazela kwamaqembu womabili bekuholela ekutheni aphunyukwe yibhola kalula. Nokho iPirates ibikade ikhombisa ukuba yingozi ngejubane nebhola layo elisheshayo. Igcine izuzile ngomzuzu ka-26 ngesikhathi uNyauza evalela phakathi ikhona ewele kuyena emuva kokuthi abadlali beBenghazi behlulekile ukuyikhipha. EZimnyama ziqhubekile nokufaka ingcindezi. Ngomzuzu ka-41 uMabasa ungqofele phakathi ikhona kaDeon Hotto.
Esiwombeni sesibili, iPirates iqhubekile nokukhombisa ukuba namandla kuneBenghazi. Ngomzuzu ka-69 kugamanxe uHotto kwesokunxele, wagobela uMabasa ibhola ebhokisini olishaye lavinjwa ngunozinti, waliqobela phakathi uDlamini. Emuva kwaleli goli iBenghazi izamile ukubuya, ithola nama-free-kick ngasebhokisini lePirates kodwa yahluleka ukushaya igoli.
Emdlalweni olandelayo weConfederation Cup, iPirates izokwamukela i-ES Setif yase-Algeria ngo-Ephreli 21 e-Orlando Stadium. KwiCaf Champions League iMamelodi Sundowns neKaizer Chiefs sebengenile kuma-quarterfinal. Uma iPirates ingalandela kungasho ukuqhubeka nokuphephezelisa ifulegi kwamaqembu akuleli kule miqhudelwano yeCaf, okuyinto ebisivame ukwenziwa iSundowns kuphela kumasizini edlule.
NgoLwesine, iPirates izodlala neSundowns kowama-quarterfinal eNedbank Cup.