Inkulisa iphokophelele ukubayisa phesheya besabancane abakuleli

NHLAKANIPHO MNQAYI

INKULISA iBritish Football Academy (BFA) ezinze KwaZulu-Natal, inenhloso yokuthuthukisa abafana bebhola likanobhutshuzwayo abanekhono ngenhloso yokubathumela kumaligi ase-England besabancane njengoba ibambisene nesikole iPinetown Boys High.

Le nkulisa esebenzisana nePinetown Boys High School, ayigcini ngokuqoqa abafana abanekhono kusukela eminyakeni engu-12 kuya kwengu-16, kepha ibanika nomfundaze wokufunda kulesi sikole, kusukela kuGrade 8 kuya ku-matric.

Ngokusho kwabaphathi besikhungo, labo abenza kahle bangagcina bewelela phesheya beyodlala kumaligi ase-England ngokwahlukana kwezigaba, okungaba yi-English Premier League, English Football Championship, ne-English Football League Divisions 1 noma 2.

Iqembu laleli lidlala ngaphansi kweSouth African Football Association (SAFA) kuDurban Central League esigabeni esingaphansi kweminyaka engu-17.

UJohn Read, noPeter Coyle abazinze eLondon, no-Ian Kilbride, ozinze eKapa, yibo abasungule le nkulisa futhi bangabaxhasi bayo njengoba bobathathu bezifela ngonobhutshuzwayo.

URead ekhuluma nabezindaba ngesikhathi beyithula ngoLwesihlanu, uthe abadlali abaningi emhlabeni bayalithola ithuba lokudlala kwi-English Premier League kodwa bancane abaqhamuka eNingizimu Afrika.

"IBritish Football Academy izimisele ukushintsha le nto yabadlali abaqhamuka kuleli ukuthi babebancane. Sizobanikeza amathuba abafana abanekhono, sibanike ugqozi nentshisekelo yokuthi baphumelele njengabadlali abadlala esigabeni esikhokhelayo. Le nkulisa ayisebenzisani namaqembu aseBritain, kepha izimele," kusho uRead.

Uqhube uthe inhloso enkulu ukubona lisabalala ikhono lalapha eNingizimu Afrika uma kuziwa kwunobhutshuzwayo.

"Sekuphele iminyaka engu-30 ngafika lapha eNingizimu Afrika, kunethalente eliningi uma kuziwa ebholeni. Amanye amazwe ayabakhiqiza abadlali abahamba beyodla phesheya kodwa lapha eNingizimu Afrika lokho akwenzeki, okuwufakazi wokuthi indlela okukhuliswa ngayo abadlali ayikho sezingeni elikahle.

“Kunekhono eliyisimanga ngendlela labadlali abadlala ngayo kodwa indlela abakhuliswa ngayo ayikho sezingeni elikahle yingakho sibone igebe nethuba lokuthi siqale inkulisa engasukumi phansi la eNingizimu Afrika, sikhulume nezikole eziningi lapha KwaZulu-Natal, kepha sase siqoka iPinetown Boys High ngenxa yegalelo lesi sikole esinalo ngakwezemidlalo nezinsiza abanazo njengesikole eziseqopheleni eliphezulu. Ukuze konke lokho kufezeke kumele laba bafana bazimisele, basebenze kanzima futhi baziphathe kahle," kulandisa uRead.

Ongumqeqeshi wale nkulisa uSiyabonga Mnganga (28), uthe: “Besifuna ukuthola abadlali abafanele, hhayi ngokwekhono kuphela kodwa ngendlela abaziphatha ngayo, indlela abazimisela ngayo, nababuka ngayo izinto ngoba sibashintshise izikole njengoba sebefunda ePinetown Boys High njengamanje.”

Lo mqeqeshi ongesiyo imfundamakhwela uma kuziwa kwezokuqeqesha uneziqu zePersonal Training and Fitness azithola e-Exercise Teachers Academy neSAFA D neConfederation of African Football (CAF) C coaching licence.

UDaine Klate owadlala kwi-Orlando Pirates nakwiBidvest Wits, waqeqeshwa eSchool of Excellence, uyinxusa lalesi sikhungo.

"Ukusebenza kwami noDaine Klate kungisize kakhulu. Uwumuntu ozithobile, ukuhlangana kwami naye luningi ulwazi asengicobelele lona njengomuntu osedlale emazingeni aphezulu wabuye wazithoba wazoqala emazingeni aphansi, ezoqeqesha ngakho ukuthola ulwazi kuye nendlela angibonisa ngayo ineqiniso, uyancoma uma kufanele, lapho engaboni kahle khona uyasho ukuthi asilungiseni, “ kusho uMnganga. Abanye abaqeqeshi abambisene nabo u-Oscar Buthelezi noMpumelelo Mkhize.