AMAQEMBU akuleli iMamelodi Sundowns neKaizer Chiefs azibekisele indawo kweyamaqoqo eCaf Champions League enqoba imidlalo yawo yomlenze wesibili wesigaba sokuhlunga.
ISundowns ihlule iJwaneng Galaxy yaseBotswana ngo 3-1 ngoLwesibili eLoftus Versfeld Stadium. Amagoli ashaywe uKermit Erasmus, Mothobi Mvala noThapelo Morena. AmaBrazilians adlule ngo 5-1 uma sekuhlanganiswa imilenze yomibili njengoba yanqoba owokuqala ekuhambeni ngo 2-0. Ngale mpumlelo yayo ibe isibhala kabusha umlando wayo kulo mqhudelwano iba yiqembu lokuqala laseNingizimu Afrika ukungena kweyamaqoqo amahlandla ayisithupha kulandelana.
Ngakolunye uhlangothi iChiefs inqobe ngo 1-0 ekuhambeni ishaya i-De Agosto yase-Angola. Igoli laMakhosi livalelwe phakathi uLeonardo Castro esiwombeni sokuqala. Leli qembu likaGavin Hunt lifike kulo mdlalo zibambene ngo 0-0 womphumela womdlalo womlenze wokuqala, belidinga ukunqoba noma lidlale ngokulingana ngamagoli ukuze lidlulele kweyamaqoqo.
Kumaqembu adlala kwiCaf Confederation Cup, i-Orlando Pirates idlulele esigabeni sokugcina sokuhlungela amaqoqo emuva kokuthi iSagrada Esperanca yase-Angola inqume ukungezi ukuzodlala umdlalo womlenze wesibili weCaf Confederation Cup kuleli ngenxa yokwesaba iCovid-19. IPirates isizoqhathwa nelinye lamaqembu ahlulwe emzuliswaneni wokuqala kwiChampions League emizameni yokuzibekisela indawo esigabeni samaqoqo. IBloemfontein Celtic izodlala namuhla neRivers United ekuhambeni yahlulwa ngo 2-0 kowomlenze wokuqala. Amaqembu azoqhathwa ngoJanuwari 17.