ISundowns njengeKaizer Chiefs igabe ngonozinti abanohlonze emabhukwini ayo.
AbeSundowns nguDenis Onyango ongukaputeni, kulandele uKennedy Mweene, kuze uReyaad Pieterse noRicardo Goss bonke abavimba emaqenjini amazwe abo.
U-Onyango wase-Uganda usewagaxa emgibeni kwelesizwe ngoba efuna ukugxila kwiSundowns.
IChiefs yona igabe ngo-Itumeleng Khune, Daniel Akpeyi, Brandon Petersen noBruce Bvuma nabo ngokunjalo, bonke (ngaphandle kukaPetersen) abangabamaqembu amazwe.
Womabili amaqembu anomkhuba wokubashintshanisa.
AbeSundowns bona kubahambela kahle kwazise bangenelwe ngamagoli ambalwa ukubedlula bonke kodwa ukushintshana kwabo ngejezi kungonakele kubenza bangabi seqhulwini ohlwini lwabangenelwe ngamagoli ambalwa.
U-Onyango, ovikela isicoco, udlale imdlalo engu-16 kweyeligi kule sizini. Kuleyo midlalo, ingu-11 engangenelwanga yigoli, ibhola ulilande kayisithupha enethini. Unekhadi elilodwa elibomvu.
Eyisikhombisa imidlalo yeSundowns yeligi idlalwe nguMweene. Kuleyo midlalo mine angangenelwanga kuyo yigoli, yena ulilande kahlanu ibhola enethini.
UPetersen usadlale emihlanu, usangenelwe yigoli elilodwa kwemithathu nokuyisibalo samagoli asawalande enethini.
UGoss usadlale owodwa nangenelwe yigoli kuwo.
Izimbangi zabo, nguVeli Mothwa noPatrick Nyame abadlale imidlalo eminingi.
UMothwa waMaZulu, usavimbe emidlalweni engu-25. Amagoli angu-18 amngenele, akhombisa ukuthi uyavuza uma eqhathaniswa nabeSundowns.
Ukudlala njalo kumbeka eqhulwini lonozinti abanemidlalo eminingi bengangenelwanga ngamagoli. Isingu-13 imidlalo uMothwa angalilandanga kuyo enethini.
Unamakhadi amabili aphuzi, akanalo elibomvu.
Omunye unozinti osondelayo embangweni womklomelo wovelele, nguNyame weRoyal AM.
Lo nozinti waseCameroon usenemidlalo engu-10 engangenelwa goli kwengu-26 asayidlalile.
Angu-23 amagoli asemngenele, uwodwa kuphela umdlalo wezakhe angawudlalanga. Unekhadi eliphuzi elilodwa.
URonwen Williams owudle kabili umklomelo kanozinti ovelele, ngo-2018/2019 nango-2019/2020, ngeke esalibona elidlalayo kwazise usalelwe yimidlalo emibili. Unemidlalo eyisishiyagalolunye kuphela engangenelwanga kuyo yigoli.
UNyame noMothwa mancane kakhulu amathuba okuthi amaqembu abo angabashintsha ezintini, kwazise adinga ukubophela amaqembu aqinile njengoba esalwela ukuqeda endaweni yesine neyesibili.
UNyame usalelwe yimidlalo emithathu engambeka emidlalweni engu-13 engalilandanga enethini ekubeni uMothwa usalelwe ngemibili engamnyusela ku-15.
Isibalo semidlalo angangenelwanga yigoli kuyo, yiso esihamba phambili emabaleni okudla ngawo unozinti ovelele ngesizini.