I-CHIPPA United idlulele kowamanqamu eNedbank Cup, ngokuguqisa iPretoria Callies ngo 1-0 emdlalweni owandulela owamanqamu, lapho izobhekana nozonqoba phakathi kweMamelodi Sundowns neTshakuma Tsha Madzivbandila namuhla ntambama.
Umdlalo eqophe ngawo umlando iChilli Boys, njengoba kuzokuba okokuqala emlandweni wayo ukufinyelela esigabeni samanqamu alo mqhudelwano, ubudlalelwa eLucas Moripe Stadium eTshwane, izolo ntambama.
Igoli eliweze abafana beChippa livalelwe phakathi nguSandile Mthethwa, ogcine ngokuba ngokuqokwa njengomdlali obevelele osukwini, emuva kwephutha elenziwe abadlali baMaRoma behlulwa ukususa umhlola ekhaya.
Womabili amaqembu aye kulo mdlalo ngenhloso yokubuyisa ukuzethemba kuwona, kwazise womabili awamile kahle kumalog amaligi adlala kuwona. IChippa ivika izembe kwiDStv Premiership njengoba isendaweni ka-15 kwi-log yePremiership, kanti iCallies engomakoti kwiGladAfrica Championship yona isendaweni ka-11 kwi-log yalesi sigaba.
Nakuba ngesiwombe sokuqala iChilli Boys kuyiyona ebiphezulu ngomdlalo, kodwa AmaRoma yiwo athole amathuba angcono okufika emapalini.
UWilliam Twala, ucishe wanika AmaRoma igoli ngomzuzu ka-26 kodwa ibhola laphebezwa ngunozinti weChippa. Kanti noThabiso Nkoana, ucishe wasa amaRoma ekhefini ehamba phambili ngenkathi ibhola lakhe liphebezwa sekuvalwe amehlo ngomzuzu ka-45. Ngesiwombe sesibili kubonakele ukuthi iChippa ibisiyifunde kahle iCallies njengoba ibisidlala kangcono kakhulu futhi ibuza, ibuzile ezintini zaMaRoma.
Nebala kugcine kuyilungele iChilli Boys ngenkathi uMthethwa eshayela leli qembu igoli elenze kwaba ngu 1-0, nokuyilona goli egcine inqobe ngalo kulo mdlalo maqede yazibekisela indawo kowamanqamu eNedbank Cup.
Emuva komdlalo umqeqeshi osabambile weChippa uSiyabulela Gwambi, uthe lo mlando bawuqophele usihlalo weqembu uSiviwe Mpengesi, nabantu base-Eastern Cape yonkana.
Umbuzo okhona njengamanje ngothi ngabe iTshakuma izokwazi yini ukuziqophela owayo umlando ikhiphe izinkunzi zangesizini edlule zalo mqhudelwano, iMamelodi Sundowns.