KUPHELILE ukulinda kubalandeli beKaizer Chiefs kulandela ukukhipha kwaleli qembu umswenko walo omusha elizobe lizama ukubuyisa ngawo isithunzi kwiDStv Premiership ngesizini ezoqala maduze.
Kusukela izimbangi zaleli qembu i-Orlando Pirates, abadudulana nazo namuhla ngo-5 ntambama kwiCarling Black Label Cup, zikhiphe owazo umswenko, abathandi baMakhosi bebelokhu belinde njalo ukubona ijezi labo elisha.
Sekuyinto efana nomdlalo ebholeni laseNingizimu Afrika ukungcofana kwabalandeli ngamajezi amasha njengoba kwenzekile kwiPirates emasontweni ambalwa adlule iveza owayo umswenko.
NakwiChiefs ememzele ngokuhlanganyela nabaxhasi bayo iNike ukuthi sebekhiphile, ngeke kumangaze uma kukhona abazoligxeka leli jezi, ikakhulukazi izimbangi.
“IChiefs nabaxhasi bayo iNike bamemezele ngokusemthethweni ijezi labo elisha lasekhaya nasekuhambeni abazolisebenzisa ngesizini ezoqala.
“Leli jezi lihamba esikweni laleli qembu ngokuhlala emibaleni omnyama nosagolide. Lakhiwe ngendlela yesimanje njengoba emqaleni ligqize ngombala omnyama no-grey owehla ngezinhlangothi zalo ijezi,” kusho isitatimende esikhishwe namuhla ekuseni.
Elasekhaya lizogqokwa nezikhindi kanjalo namasokisi agolide anokumnyama.
“Le ngxube yemibala iyona egqame kakhulu kwelasekuhambeni. Lokhu besikwenzela ukuthi kungabibikho ukungabaza ukuthi leli ijezi leqembu elilodwa, umehluko ukuthi elinye elasekhaya, elinye elasekuhambeni.”
Okuqaphelekile lapha ukuthi ijezi leChiefs lasekuhambeni lichazwe ngendlela okuyiyona ebeligconwa ngayo ngesikhathi kusaputshuka izithombe zalo kwezokuxhumana.
“Ijezi lethu lasekuhambeni singasho ukuthi limnyama kodwa ukhona no-grey bese kuba imigqa ehamba kulona lonke ekhombisa izindlela ezahlukene ezinqamula i-Afrika kulandela ubuqhawe obukhonjiswe ileli qembu kwiCaf Champions League ngesizini edlule.”
Bayalincoma abeChiefs nabakwaNike leli jezi elizogqokwa nezikhindi ezimnyama namasokisi amnyama kodwa anayo le mibala ebonakala ejezini.
Kusukela leli qembu liveze umswenko wabesifazane ngo-2017, imphumelelo yalesi sinqumo isobala kangangokuthi naleli elisha likhona elabesifazane. f
“Sijabule kakhulu ukuthi nakwelasekuhambeni likhona elabesifazane kanti sekuzobakhona nelezingane kusukela kule sizini,” kusho uJessica Motaung oyisikhulu sezokumaketha kwiChiefs.