Intatheli yeSolezwe
IKAIZER Chiefs ihlulekile wukungena kwiTop 8 yeDStv Premiership ngemuva kokubanjwa yiBaroka FC emdlalweni weDStv Premiership ogcine uphele ngo 1-1 ngoLwesine ntambama ePeter Mokaba Stadium, eLimpopo.
Amakhosi abedinga ukunqoba ukuze akwazi ukungena kumaqembu ayisishiyagalombili aphezulu kwi-log kodwa ngenxa yalo mphumela asahleli endaweni yesishiyagalolunye ngamaphuzu awu-25.
Lona bekuwumdlalo wesibili kulandelana ehluleka wukuthola amaphuzu agcwele. Kodlule ashayana aze abukana neStellenbosch FC umdlalo uphela ngo 2-2. Agcina ukunqoba ngo 1-0 kwiligi ehlula i-Orlando Pirates.
Nakuwona lo mdlalo iChiefs bekungathi izogcina inqobe ngalo igoli elilodwa njengoba ibibekwe phambili uLebo Manyama esiwombeni sesibili. Nokho ngemuva kokucindezela kweBaroka, leli qembu lasekhaya ligcine lilitholile igoli lokulinganisa elibekwe enethini u-Evidence Makgopa.
IChiefs ayizange ibe nesizini enhle kwiPremier Soccer League njengoba ihlulekile wukuthatha iMTN 8 neNedbank Cup, idonsa ngodizili nakwiligi. Isilwela ukuthi okungenani ukuqeda kwiTop 8 nokuzoyinika indawo kwiMTN 8 ngesizini ezayo.
Kulo mdlalo iBaroka iyona eqale yathi ukuphatha umdlalo kodwa kungekho okutheni okuthusa u-Itumeleng Khune emapalini eChiefs. Kunalokho ngemuva kwemizuzu ewu-10 kuqale umdlalo umgadli weChiefs uSamir Nurkovic udlaliswe kabi ebhokisini kodwa unompempe uVelaphi Sicelo wangakubona lokho njengephenathi. EzikaHunt ziqhubekile nokuhlasela kodwa kwangalunga kwaze kwayiwa ekhefini. .
Esiwombeni sesibili, iChiefs ithole igoli ngomzuzu-58 ngemuva kwebhola elihle alifakelwe uKhama Billiat ngesithende. IBaroka iqhubekile nokuhlasela iphindelela. Ngomzuzu ka-81 uMakgopa ushayele iBaroka igoli lokulinganisa emuva kwebhola eligotshwe kwesokudla.