IKAIZER Chiefs isiyethule uKeagan Dolly noCole Alexander kubadlali bayo abasha ezigqama ngabo ngesizini ka-2021/2022.
“Abadlali abasha!” kusho iChiefs kwiTwitter yayo.
“Amabhubesi amasha ajoyina umphandwi. Sethula ngokusemthethweni ukusayinisa uCole Alexander noKeagan Dolly eqenjini. Siyanamukela Makhosi, siyajabula ukuthi nibe nathi.”
UDolly ubenganaqembu ngemuva kokuphela kwenkontileka kwiMontpellier emthathe kwiMamelodi Sundwns eqeda ukunqoba iCaf Champions League neCaf Super Cup ngo-2016.
IChiefs ibimbanga ne-Al-Ahly ecijwa nguPitso Mosimane nokho asheshe wayicacisela ukuthi akayi kuyo.
UCole naye ubedlala phesheya.
Bobabili laba badlali badlalile kwiBafana Bafana ngaphansi komqeqeshi weChiefs, uStuart Baxter, oshaya ibuya ngemuva kokuyifulathela ngo-2015.
Nangesikhathi efika okokuqala kwiChiefs uBaxter, wasayinelwa inqwaba yezilomo zabadlali.