South Africa (1) 1
Ethiopia (0) 0
IBAFANA Bafana iqhubekile nokucaba indlela ebheke koweNdebe yoMhlaba ngokwehlula i-Ethiopia emdlalweni wokuhlunga eFNB Stadium, eNasrec, ngoLwesibili ebusuku.
Igoli leBafana kube wumkhonto ogwaze ekhaya womgadli uGetaneh Kebede ongukaputeni we-Ethiopia esiwombeni sokuqala.
Emdlalweni womlenze wokuqala ekuhambeni ne-Ethiopia, iBafana yanqoba ngo 3-1.
IBafana ingene enkundleni isinengcindezi yokunqoba kulandela ukuwina kweGhana eyehlule iZimbabwe eHarare ngo 1-0. Lokhu kuholele ekutheni iBafana ingene enkundleni seyehlile esicongweni se-log kaGroup G, sekwenyuke amaBlack Stars ngamaphuzu ayisishiyagalolunye. Nokho ukwehlula i-Ethiopia kuyibuyisele eqhulwini ngamaphuzu angu-10.
Umbango weqembu elizodlulela emdlalweni wokugcina wokuhlunga ngoMashi ususele phakathi kweBafana neGhana. Iqembu elizoqeda eqhulwini lizojoyina amanye ayisishiyagalolunye azoshaya amaphiko kwamanye amaqoqo.
Amazwe azodlala ekhaya nasekuhambeni, kusale ayisihlanu azomela izwekazi i-Afrika koweNdebe yoMhlaba eQatar ngonyaka ozayo.
Emidlalweni emibili yokugcina iBafana izobhekana neZimbabwe ekhaya ngoNovemba 11, ivale neGhana ekuhambeni ngoNovemba 14.
Kulo mdlalo obuseFNB Stadium, i-Ethiopia iyona ekhombise ukuzinza kuqala nokuphatha ibhola. IBafana bekucacile ukuthi ifuna ukusebenzisa iqhinga lokuyidoba i-Ethiopia, idlale amabhola emuva kodonga lwayo emuva ukuze isebenzise ijubane labagadli uBongokuhle Hlongwane, Evidence Makgopa noVictor Letsoalo.
Kusheshe kwabalungela abafana bakaHugo Broos ngesikhathi uKebede elivalela ngakubo kukade kuyikhona kaYusuf Maart ngomzuzu ka-11. Emuva kwalokho i-Ethiopia izamile ukuphendula ngokushesha kodwa yehluleka ukushaya igoli.
Esiwombeni sesibili, i-Ethiopia ibuye ngomfutho ofanayo neqale ngawo umdlalo kodwa izinto ziyiphika. Ngomzuzu ka-55 ibhola likaMakgopa lichithwe seliyongena esedlulile kunozinti we-Ethiopia.
IBafana Bafana yagcina ukudlala kwiNdebe yoMhlaba ngo-2010 ngesikhathi iNingizimu Afrika ingosokhaya. Ngaphambi kwalokho yayikade igcine ukuzibekisela indawo ngezithukuthuku zayo emqhudelwaneni wango-2002 eKorea/Japan.
Ngale kwalokho leli qembu selijwayele ukuphoxa abalandeli ngokuhluleka wukuzibekisela indawo emiqhudelwaneni. UBroos uthathe izintambo kuMolefi Ntseki ophoxekile ehluleka wukufaka iqembu kwi-Africa Cup of Nations ezoba seCameroon ngonyaka ozayo.