SITHEMBISO MKHIZE
South Africa (0) 0
Senegal (0) 0
IBAFANA Bafana ibuyise isithunzi sayo ngeCosafa Cup ishaya iSenegal ngo-5-4 wamaphenathi, kowamanqamu ngeSonto eNelson Mandela Bay Stadium, eGqeberha e-Eastern Cape.
Umdlalo uphele zibambene ngeqanda. Kuyiwe esikhathini esengeziwe nakhona ayibangabikho efuna ukugoba uphondo.
EzikaMorena Ramorebodi zizakhele igama elihle emqhudelwaneni walo nyaka zingashaywa nakowodwa umdlalo, kusukela esigabeni samaqoqo.
Sekuhlanganiswe yonke imidlalo iNingizimu Afrika, ishaye amagoli ayisikhombisa. Ngokunqoba lapha, iBafana ibe seyibambana neZambia ngokunqoba iCosafa kahlanu.
Yaqala ukuyinqoba ngo-2002, 2007, 2008 nango-2016.
IZambia ekhishwe esigabeni samaqoqo, isonge endaweni yesithathu ngamaphuzu amane, kanti iyona ebiyizingqwele ngo-2019.
ISenegal ebiqede endaweni yokuqala ku-Group B, ngamaphuzu ayisishiyagalolunye, beyiyisimenywa njengoba ingekho emazweni akhele i-Afrika eseningizimu.
UVictor Sepana odlalela iBloemfontein Celtic, ube ngumshayimagoli ovelele ngamane. Esiwombeni sokuqala iNingizimu Afrika, ayidlalanga kahle.
Nakuba neSenegal kulesi siwombe beyingekho bukhali ngaleyo ndlela kodwa kungaba yiphutha ukuziba iminyakazo yabadlali bayo okukhona u-Alessame Kante. Elinye lamabhola akhe like lashaya ipali likaVeli Mothwa, unozinti wakuleli. Empeleni kulesi siwombe iBafana beyithwele kanzima.
Zisuka esiwombeni sesibili elakuleli bekungathi lithelwe ngezibonkolo, lihlasela kodwa ekugcineni alizange litholakale igoli. La maqembu adudulane kwaze kwafika esikhathini esengeziwe kodwa nakhona lanqaba igoli kwaphoqa ukuthi umpetha acaciswe ngokushaya amaphenathi.
Ngesikhathi kukhahlelwa amaphenathi kuwona womabili amaqembu kube nomdlalo oyedwa ogejile. Nokuphoqe ukuthi kungenelwe kumaphenathi esithupha, iBafana yalishaya phakathi kwathi iSenegal yageja, kwaba wukunqoba kwelakuleli.