IMARITZBURG United ibuyise u-Ernst Middendorp njengomqeqeshi wayo. Bekuvele kusabalele ukuthi uzobuyela eqenjini laseMgungundlovu elixoshe u-Eric Tinkler ekuqaleni kwesonto ngenxa yokuphikwa yimiphumela.
Umqeqeshi waseGermany umenyezelwe izolo ntambama. Unikezwe inkontileka yeminyaka emithathu. Kuthiwa ngabadlali abadala eqenjini abamfunile ukuthi azoqeqesha. Usebuya okwesithathu kwiTeam of Choice abeyiqeqesha ngo-2009-2011, nango-2012-2013.
UMiddendorop ushiye phansi izintambo e-Ethiopia lapho ebeqeqesha iqembu lakhona iSaint George. Ubelijoyine emuva kokukhonjwa indlela yiKaizer Chiefs ngenxa yokuhlulwa yisicoco seligi emdlalweni wokugcina ngesizini edlule.
Uzofika kwi-United ivale emsileni kwi-log yeDStv Premiership ngenxa yokuthi iqembu alinqobanga nowodwa umdlalo no-Tinkler emidlalweni emine.
Namuhla iTeam of Choice izokwamukela iSuperSport United koweligi eHarry Gwala Stadium ngo-8 ebusuku.
UMiddendorp uqashwe izintambo sezinikezwe uDelron Buckley obeyiphini likaTinkler ukuthi abambe.