STHEMBISO NGOBESE
ITSHAKUMA Tsha Madzivhandila (TTM) iphule irekhodi lokungehlulwa le-Orlando Pirates ngesikhathi iyiguqisa ngo 2-1 emdlalweni weDStv Diski Challenge obuseMakhulong Stadium, eTembisa izolo ntambama.
Amagoli anqobise abafana beTshakuma, eqeqeshwa nguDavid “DVD” Mathebula, abekwe enethini nguThabiso Msimango ngomzuzu wesine no-Itumeleng Selemela ngomzuzu ka-56.
Abafana beBucs, abacijwa nguMandla Qhogi, bafike ensimini bebukeka beyizimfivilithi ekunqobeni umdlalo weqoqo lesibili kwi-Inland kwazise emidlalweni emithathu bebengakahlulwa, beyinqobe yonke.
Ngesikhathi la maqembu esazama ukufudumala esiwombeni sokuqala, iTshakuma iqhamuke nomnyakazo omuhle kungazelele muntu, u-Allister Jacobs egqashuka nebhola ngasesiyingini sesenta, walidlulisela kuMsimango ongananazanga ukulibeka enethini, wasala enkemile unozinti weBucs, u-Allex Appollonanos.
Ngemuva kwaleli goli leTshakuma, abafana beBucs bavuke emaqandeni, bahlasela befuna igoli lokulinganisa. Kuthe ngomzuzu ka-11 unozinti weTshakuma uTsakiso Nkuna wavimba ibhola elibi ebelingqofwe ngekhanda nguMorapedi Ralenkoane weZimnyama.
Ngomzuzu ka-17 uNkuna uphinde watakula iTshakuma, evimba inguzunga yeshodi ebithunyelwe nguSiyabonga Buda weBucs engaphandle kwebhokisi.
IPirates iqhubekile nokuhlasela esiwombeni sokuqala kodwa iTshakuma ibingafuni lutho emuva. Kuyiwe ekhefini ezikaMathebula zihamba phambili ngo 1-0.
Ngesikhathi zibuya ekhefini, iPirates iqhubekile nokuhlasela ilokhu ingqongqoze njalo odongeni lwasemuva lweTTM.
Ngomzuzu ka-52 iBucs isinde ngokulambisa ngesikhathi ibhola lika-Allister weTTM lishaya ipali laqeda labuyela ensimini, esedideke waphela unozinti u-Appollonanos.
Ngomzuzu ka-56 iTshakuma ithole igoli layo lesibili ngonyawo lukaSelemela, odonse intambo esanda kungena ebhokisini, kwabhakuza inethi.
Ngomzuzu ka-77 uBoitumelo Radiopane ubuyise ithemba kwabeBucs ebeka ibhola enethini ngemuva kwesibhudubhudu ebhokisini, okwenze walizwa ngendaba uNkuna weTshakuma.
Nakuba ihluliwe iPirates kodwa yiyona esazihola phambili eqoqweni layo ngamaphuzu ayisishiyagalolunye emidlalweni emine. ITshakuma ihlezi endaweni yesithupha.
Imiphumela yayizolo yeDStv Diski Challenge:
Swallows 1-1 Bloemfontein Celtic; Maritzbug United 2-2 AmaZulu; Orlando Pirates 1-2 Tshakhuma.