I-Downs Ladies izigwazele ibhece kowokuvula weCosafa
U-ANDISIWE Mgcoyi weMamelodi Sundowns Ladies ejabulela nozakwabo elinye lamagoli akhe amabili alishaye bebhudluza iCosta Do Sol koweHollywoodbets Cosafa Women’s Championship eSugar Ray Xulu Stadium ngeSonto Isithombe: BACKPAGEPIX
Mamelodi Sundowns Ladies (5) 8
Costa do Sol (0) 1
IMAMELODI Sundowns iqale ngegiya eliphezulu ukuvikela isicoco sayo ngokubhudluza iCosta do Sol yaseMozambique ngo 8-1 emdlalweni wokuvula weCosafa Caf Champions League ngeSonto.
Bekuwumdlalo wokuqala walo mqhudelwano ozokhipha iqembu elizomela isifunda seCosafa kwiCaf Champions League odlalelwa eSugar Ray Xulu Stadium, eClermont.
UMelinda Kgadiete no-Andisiwe Mgcoyi bashaye amagoli amabili umuntu ngamunye, amanye avalelwa nguZanele Nhlapo, Miche Minnies noRhoda Mulaudzi, kwathi umdlali weCosta uNadia Farranguana walihlohla ekhaya.
Igoli lokubika lezivakashi kube yiphenathi ebekwe enethini nguCidalia Cuta ngasekupheleni kwesiwombe sesibili.
Igoli lokuqala lingene ngomzuzu wesibili uKgadiete evalela phakathi ibhola ebeligotshwe nguChuene Morifi ngakwesokunxele.
UMgcoyi ube eseshaya amagoli amabili elandelana ngemuva kwemizuzu engu-30 umdlalo uqalile, elilodwa ulibeke phakathi ngonyawo, elesibili walivalela ngekhanda.
Ukaputeni uNhlapo uyinamathisele enethini iphenathi ngomzuzu ka-38 ngemuva kokuthi isitobha seCosta, u-Eufasia Soto, ebambe ibhola ngesandla ebhokisini.
Kuyiwe ekhefini ezikaJerry Tshabalala sezihamba phambili ngo 5-0 kulandela igoli elingqomfelwe enethini uKgadiete.
Ngesiwombe sesibili uMiche Minnies obeqhamuka ebhentshini ulivalele phakathi kwaba ngu 6-0 ngaphambi kokuthi umkhonto kaFarranguana ugwaze ekhaya ngesikhathi ezama ukumaka uGabbonelwe Kekana.
UMulaudzi ugcine elitholile igoli lakhe ngomzuzu ka-69 ngemuva kokwakhela ozakwabo inqwaba yamathuba, kwaba ngu 8-0.
Izivakashi zithole umthobanhliziyo ngephenathi ngomzuzu ka-77. UNhlapo ubambe ibhola ngesandla ebhokisini, uCuta wabe eselibeka phakathi engabonanga lutho unozinti.
AmaSandawana aseqhwakele kuGroup A ngamaphuzu amathathu. Kolandelayo kweyamaqoqo bazodlala neDouble Action Ladies yaseBotswana ngoLwesibili ntambama ngo-12.
ICosta do Sol neDouble Action bazogadulisana ngoLwesine ntambama ngo-12, khona eSugar Ray Xulu Stadium.
Iqembu elizoqeda liqhwakele kuGroup A lizobhekana nelizokhonya kuGroup B kowamanqamu ngoMgqibelo ntambama.