ZAKHELE XABA
Lamontville Golden Arrows (0)0
Richards Bay FC (1)2
BATHUMELE umyalezo ocacile omakoti beDStv Premiership, iRichards Bay FC, behlula iLamontville Golden Arrows emdlalweni wokuvula weligi ePrincess Magogo Stadium, KwaMashu, ngoMgqibelo ntambama.
Amagoli eBay ashaywe nguSomila Ntsundwana no-Ntuthuko Mabaso esiwobeni ngasinye.
IBay, ewine iligi yeMotsepe Championship Foundation ngesizini edlule, kade idlala okokuqala kwiPremiership.
Kade inengcindezi yokuyiqala kahle isizini esigabeni esikhulu ukuze izoqinisa ithemba kubalandeli besifundazwe iKwaZulu-Natal, abebeyijabulela njengeqembu lesihlanu kulesi singaba.
Ngasekupheleni kwesonto, usihlalo uSifiso Biyela, ukugcizelele ukuthi ufuna iqembu lakhe lizinze kwiPremiership ngaphambi kokuqala ukulwela izococo kumasizini ezayo.
Ngokucosha amaphuzu amathathu emdlalweni wokuqala wesizini, iBay ithumele umyalezo wokuthi ngeke iphenduke imayini yamaphuzu emaqenjini ewafice kwiPremiership.
Enkundleni, iBay ikhombise ukungesabi ihlasela zibekwa. Nokho womabili amaqembu abehluleka ukwakha amathuba acacile okushaya amagoli okwenze umdlalo ubande.
Izinto ziqale ukuvuleka sekuphele imizuzu engu-20 umdlalo uqalile ngesikhathi ibhola elingqofwe nguPule Mmodi lishaya ipali libuyela enkundleni ngoka-26.
Lelo bhola iBay ilithathile yahlasela, nokugcine ngokkuthi aliqobela phakathi uNtsundwana ekade eligingqelwe nguSanele Barnes. Emuva kwaleli goli, i-Arrows izamile ukubuya kodwa izinto bezingayivumi.
Esiwombeni sesibili, i-Arrows ubuye yaqhubeka nokuhlasela iBay, kodwa ibuthuntu phambili lapho obekudlala khona uRyan Moon kuhlale obala njengoba beyihlulwa amathuba abeyinsada.
Nakuba iBay ikade inengcindezi kodwa ibikhombisa ukuba yingozi uma ithola ibhola. Ngomzuzu ka-71, uMabaso ungqofele phakathi ifree-kick kaBarnes. Emuva kwaleli goli, iBay ifake abadlali abazomaka, izama ukuvikela amagoli ayo amabili. Lokho kwenze izinto zaba nzima kwi-Arrows.