IDiski Yomhlaba
UKUQALA kwemidlalo yama-Olympic kudale isasasa kubathandi bezemidlalo eyahlukene, okubalwa kuyo ibhola likanobhutshuzwayo njengoba kubhekwe ngabomvu ukuthi ngabe iBrazil izokwazi yini ukuvikela isicoco sayo esinqobe ngo-2016?
Le midlalo engundabamlonyeni emhlabeni wonke jikelele kule zinsuku, iqale eTokyo, eJapan, kuleli sonto.
Iqembu lesizwe iBrazil labadlali abaneminyaka engaphansi kwewu-23, elalingosokhaya kuma-Olympics ayeseRio de Janeiro, eBrazil, ngo-2016, yilona eladla umhlanganiso liguqisa iGermany ngo-5-4 kowamanqamu sekukhahlelwa amaphenathi.
Kanti kulo mqhudelwano, iBrazil esifinyelele kowamanqamu amahlandla amabili elandelana, okungu-2012 no-2016, akukho ukungabaza ukuthi ingelinye lamaqembu abhekwe ngabomvu emqhudelwaneni wakulo nyaka.
Phakathi kwawo kubalwa iGermany, iMexico, ne-Argentina. Kanti kawase-Afrika kubhekwe i-Ivory Coast, Egypt neNingizimu Afrika.
Nakuba amazwe ase-Afrika engavamile ukwenza kahle kulo mqhudelwano, kodwa ukwehluleka kweNigeria ukuzibekisela indawo kuma-Olympics akulo nyaka kubukeka kulilahlisa ithemba ngamaqembu ase-Afrika.
INigeria neCameroon, yiwona kuphela amaqembu ase-Afrika aseke awunqoba lo mqhudelwano wama-Olympics. INigeria yiyona eyavula indlela iwunqoba ngo-1996, kwalandela iCameroon ngo-2000, eSydney, e-Australia.
IBrazil ibophele uBruno Guimaraes oyisihlabani seLyon edlala kwi-Ligue 1 yaseFrance, uReiner obolekiswe yiReal Madrid kwiBorussia Dortmund, nensephe uDani Alves (38) ongumakadebona wodumo kwiBarcelona, baphakathi kwezethenjwa zeBrazil okulindeleke igadle ngazo ekulweleni ukuvikela isicoco sayo.
IBrazil evule neGermany ngoLwesine kuGroup D, kusasa izodudulana ne-Ivory Coast, e-International Stadium, eYokohama, ngo-5.30 ntambama.
IMexico eseqoqweni likaGroup A, nevule neFrance ngoLwesine, igabe ngoDiego Batis ogijima kwiReal Batis, edlala kwiLa Liga yaseSpain, nonozinti osengumakadebona, uGuillerno Octoa osedlale amahlandla amane kweyeNdebe yoMhlaba.
I-Japan, engosokhaya ivule neNingizimu Afrika ngoLwesine, yona igabe ngoTakefusa Kubo (Real Madrid) noMaya Yoshida weSampdoria yase-Italy.
I-Germany efinyelele kowamanqamu alo mqhudelwano ngo-2016, njengokujwayelekile ibophele izethenjwa zayo ezigijima kwiligi yaseGermany, iBundesliga, phakathi kwazo okubalwa uRagnar Ache noKeven Schlotterberck.
Ngesifanayo nakwi-Argentina ebophele abadlali bayo basekhaya abagijima emaqenjini akhona e-Argentina, okubalwa kubo uThiago Almada noFrancisco Ortega abadlala kwiVelez Sarsfield yase-Argentina.
Kanti umqeqeshi weSpain, uLuis de la Fuente, ukhombise ukungasinisi mahleza ngokubophela abadlali abayisithupha abasanda kubamba iqhaza kwi-Euefa Euro Championship, okungu-Eric Garcia (Barcelona), Dani Olmo (RB Leipzig), Unai Simon (Athletic Club), Mikel Oyarzabal (Real Sociedad), ukubala abambalwa.
Imidlalo kaGroup C:
Kusasa:
Egypt v Argentina (Sapporo Dome, 4.30pm); Australia v Spain (Sapporo Dome, 7.30pm)
Imidlalo kaGroup D:
Kusasa:
Brazil v Ivory Coast (International Stadium, 5.30pm); Saudi Arabia v Germany (International Stadium, 8.30pm)