LISAFUNWA njengekhambi lesifo esibhebhethekayo iqhinga lokuqeda ukukhonya kweMamelodi Sundowns kwiDStv Premiership.
Unyaka u-2021, obekudlange kuwo iCovid-19 evimbele abalandeli ezinkundleni, uphinde wakubeka obala ukungabi nantanga kweSundowns ebholeni laseMzansi. AmaBrazilians awine indebe yeligi yePremiership ihlandla lesine kulandelana ngamaphuzu angu-67. Leli qembu livule unyaka ngokuthela isibhaxu i-Orlando Pirates ebibukeka ihlangana ngaphansi komqeqeshi, uJosef Zinnbauer, waseGermany ogcine exoshiwe. ISundowns yehlule iPirates amahlandla ayisihlanu ngo-2021. Umlilo kazokhele ubhebhetheke njalo, usha ubuhanguhangu kwaze kwaphela isizini iSundowns isahlulwe kanye kwiligi.
Ekuqaleni kwesizini entsha iSundowns iqinise isikwati sayo ngabadlali okukhona kubona uThabiso Kutumela, obesuka kwiMaritzburg United, Neo Maema obeyibamba kwiBloemfontein Celtic nabanye. Iqale isizini entsha ngokuwina indebe yeMTN8 yehlula iCape Town City kowamanqamu. Kule minyaka embalwa edlule kunzima ukukhuluma ngePSL ngaphandle kokukhuluma ngokuzidlela amahlanga kweSundowns.
AMAQEMBU AMASHA KWI-PSL
*Emuva kwesizini iTshakhuma Tsha Madzivhandila (TTM) ithenge iBidvest Wits, abaphathi bayo, okukhona kubona uLawrence Mulaudzi, bahlulekile wukuphatha iqembu phezu kokuwina iNedbank Cup. Bagcine sebelidayisa phakathi ngonyaka, lathengwa ngu-Abram Sello walibiza ngeMarumo Gallants okuyiyona eqhubeke nomsebenzi wokuyodlala kwiCaf Confederation Cup. UMulaudzi wehlele kwiGladAfrica neTTM emuva kokuthenga ubulungu beRoyal AM.
*Emuva kwamasizini ambalwa iCape Umoya yasungulwa, ikade ithenge ubulungu bePlatinum Stars eyayidliwe yizembe, uRoger De Sa nozakwabo banqume ukuyidayisa. Ithengwe nguRobinson Ramaite waseLimpopo wayibiza ngeVenda Football Academy.
AMACALA KWI-PSL NGO-2021
Kuhlale obala okuningi ngokungahleleki kwePSL ngesikhathi kungacaci ngeqembu elizonyukela kwiPremiership phakathi koweRoyal AM neSekhukhune United. Emuva kokuthi iRoyal iqede ihlezi esicongweni ngamaphuzu, iSekhukhune iwine icala ebelihlanganisa iPolokwane City eyephula umthetho wabadlali abaneminyaka engaphansi kuka-23 esikwatini sosuku lomdlalo. Kugcine kungeniswana ezinkantolo emuva kokuthi umahluleli weSouth African Football Association (Safa) evune iSekhukhune. Ekugcineni iSekhukhune inyukele kwiPremiership. IRoyal inqabile ukuyodlala imidlalo yokuhlunga njengeqembu eliqede endaweni yesibili. IPSL ilihlawulisile leli qembu ngokufaka iligi ehlazweni.
*Ngenyanga yokugcina iKaizer Chiefs ifake isicelo sokuhlehliselwa yonke imidlalo yangoDisemba ngenxa yokuhlaselwa yigciwane leCovid-19 ekhempini. IChiefs ayilubhadanga koweCape Town City noweLamontville Golden Arrows. IPSL isichithile isicelo saleli qembu sokuhlehliselwa imidlalo. Amakhosi afake isicelo sokusiphikisa isinqumo sePSL.
EZISHIYE ABANTU BEBAMBE ONGEZANSI NGO-2021.
*Ukubhiyoza koweRoyal AM neSekhukhune ngosuku lokugcina lweligi yeGladAfrica kushiye abalandeli bezemidlalo bemangele. Womabili la maqembu anikeze abadlali bawo izindondo zokunqoba, aqhubeka nemicimbi yokubhiyoza. Okumangaze kakhulu wukubona umphathi weRoyal, uShauwn Mkhize, ebhekana nePSL okuyinto engajwayelekile kwazise abaningi bayabesaba ubuholi bale nhlangano.
*Ngemuva kokugadla zephuke, uMaMkhize unqume ukuthenga iBloemfontein Celtic ebikade inezinkinga zemali ngaphansi kukaMax Tshabalala. Lokhu kushiye abaningi beshaqekile ngenxa yomlando weCeltic nabalandeli ebashiyile eFree State.
*Ngesikhathi iNingizimu Afrika ijabulela umsebenzi wokwakha kabusha iqembu lesizwe komqeqeshi, uHugo Broos, lo mqeqeshi waseBelgium uveze ukuthi anqatsheliwe amaphini akhe ukuyobuka umdlalo we-Orlando Pirates neMamelodi Sundowns e-Orlando Stadium. Lokhu kwenzeka phezu kokuba benazo zonke izimfanelo. I-PSL igcine ixolisile kuBroos ngalokhu.
*Kuphinde kwasuka isidumo ngaphambi kokuphela konyaka ngesikhathi usihlalo weTS Galaxy, uTim Sukazi, enqatshelwa ukungena ezindlini zokushintshela ngaphambi komdlalo nezakhe e-Orlando Stadium. USukazi ugcine ebanjwa ngesidlozana ngonogada base-Orlando Stadium. Ugcine efake icala kwiPSL.
*Ngesikhathi kulindeleke ukuthi iPSL ibhekane nokungayi enkundleni kweChiefs, ishiywe abethimba lezomthetho, okuyinhloko, uMichael Murphy, nomshushisi, uNande Becker.
EZINHLE KWI-PSL NGO-2021
*Ukungena esigabeni samaqoqo emiqhudelwaneni yeCAF kwamaqembu amathathu aseMzansi akubuzwa ukuthi kuyilethele isithunzi iPSL. AmaZulu neMamelodi Sundowns ayibamba kwiChampions League. IPirates idlala kwiConfederation Cup.
*Ngaphandle kwempumelelo yala maqembu, okunye okuphakamise iPSL ukufinyelela kowamanqamu kweKaizer Chiefs egcine ihlulwe yi-AL Ahly ephekwa nguPitso Mosimane.
OKULINDELEKE KWI-PSL NGO-2022
Cishe bonke abalandeli bebhola eMzansi babheke ukuthi iPSL iqhamuke nesixazululo sokuthi babuyele ezinkundleni njengoba bephinde baqeda unyaka bengavumelekile ngenxa yeCovid-19. IPSL ayikavumeli ngisho izintatheli ezinkundleni, izeseka ngesibalo esincane esivunyelwe ngabezempilo emdlalweni ngamunye.
*INingizimu Afrika yonke ibheke isinqumo sePSL ngeChiefs kwazise ikomidi eliphezulu lale nhlangano lizohlangana ukuze likhiphe isinqumo esingujuqu ngenyanya ezayo.