KUGQAMISA indima eklanywa wukudlala kwi-Uefa Champions League ekumaketheni iqembu emphakathini nakubatshalizimali ukuvela kwezindaba ezithi amasheya e-Olympique Lyon aqumbeke phansi ngemuva kokuhlulwa yiBayern Munich kwisemifinal ngoLwesithathu ebusuku.
Kuthiwa amasheya eLyon, abenyukele phezulu ekuqaleni kwesonto ngemuva kokuthi benqume iManchester City kwi-quarterfinal, abesehle ngo 4,7% ngo7 ekuseni.
ILyon ngeledlule ibishayela phezulu ngemuva kokunquma iCity kaPep Guardiola ngo 3-1 eLisbon.
NgoLwesithathu kodwa ingene enkundleni yazi ukuthi ibhekene nezimbila zithutha kwiBayern, ephoxe izinkumbi ibhudluza iBarcelona kaLionel Messi ngo 8-2 kwiquartefinal.
ILyon yiyo eqale umdlalo ihlasela iBayern kodwa ingalitholi igoli kwaze kwaba uSerge Gnabry ushaya ezakhe adume ngazo ephendula izitobha zeqembu laseFrance ebasela amagoli amabili ngaphambi kwekhefu ebeka phambili ompetha baseGermany.
URobert Lewandowski ushaye igoli lesithathu leBayern,eliqinisekise uktuhi bahlanga nompetha baseFrance, iParis Saint Germain kowamanqamu ngeSonto ngo-9 ebusuku.