TS Galaxy (0) 0
AmaZulu (0) 1
AMAZULU andise izinkinga zeTS Galaxy eyishaya kulo mdlalo weDStv Premiership obuseMbombela Stadium eMpumalanga ngoLwesibili ebusuku.
USuthu lunqobe ngengcwenga yegoli likaLuvuyo Memela aliqabulise inethi ngomzuzu ka-56 ngemuva komnyakazo omuhle kaBongi Ntuli obephuma ebhentshini noTercious Malepe.
Lo bekuwumdlalo wesikhombisa amaRockets ehluleka ukunqoba. Asedlale ngokulingana kwemithathu, athelwa umpentshisi kwemihlanu.
Ngaphambi kwalo mdlalo abemakhulu amathemba kwabeGalaxy okuthi umqeqeshi omusha, uSead Ramovic, waseSerbia uzofika noshintsho.
Uthathe indawo ka-Owen Da Gama okhonjwe indlela ngenxa yokuhlulwa yiyo belu imiphumela.
EzikaTim Sukazi zizoqhubeka nokuhlala endaweni yokugcina kwi-log ngamaphuzu amabili.
USuthu, olucijwa nguBenni McCarthy, lunyukele endaweni yesithupha ngamaphuzu ayishumi.
Nakuba esiwombeni sokuqala abadlali basesiswini, abanjengoXola Mlambo, Makhehleni Makhaula, Memela, Augustine Mulenga noSiyethemba Sithebe, bebeza kahle kodwa kugqame ukulahla ibhola kalula koSuthu nokwenza amaphutha.
KwiGalaxy kubonakale ukuzethemba kwabadlali abanjengo-Ebrahim Seedat obewuhlupho kwesokunxele esuka emuva.
USiphelele Mthembu akabuyanga kufanele esiwombeni sesibili. Ngomzuzu ka-30 emuva kwebhola ebeligotshwe ngobuchule uSithebe, uvele watatazela esikhundleni sokuliqabulisa inethi. Usanda kuqala umdlalo likhona nethuba elitholwe uMulenga kodwa lashaya ipali. Nakuba bebeshesha abadlali bamaRockets, abanjengoLindokuhle Mbatha noTshegofatso Nyama kodwa kulesi siwombe alikho ibhola eliyingozi elivinjwe uVeli Mothwa emapalini oSuthu.
Esiwombeni sesibili lubuye ngamandla uSuthu nokuholele ekutheni luthole igoli. Kube nomthelela omuhle ukungena kukaNtuli oyeke igoli seliyoshona ilanga.
Izinhlelo zikaRamovic zibuye zabulawa ukukhishwa ngekhadi elibomvu kwesitobha sakhe, uPogiso Sanoka, obedle ngokuqinisa isicathulo.
Ngempelasonto AmaZulu azodlala ekuhambeni neTP Mazembe yaseDemocratic Republic of Congo (DRC) kowokuhlungela ukungena esigabeni samaqoqo eCaf Champions League.
NgoMgqibelo, ezikaRamovic zizophinde zizame ukuthola amaphuzu aphelele uma sezidlala neMaritzurg United ekuhambeni, eHarry Gwala Stadium.
Komunye umdlalo wangoLwesibili weligi, iRoyal AM ibuye ekugcineni yabambana ngo-2-2 neMarumo Gallants ePeter Mokaba Stadium.