AMAZULU FC akhombise izimpawu zokuthi inkonyane izosheshe isijwayele isisinga kwiCaf Champions League, ngenkathi edlala umdlalo wesithathu kuyo ebambana neTP Mazembe ngo 0-0 eMoses Mabhida Stadium, eThekwini izolo ntambama.
Umlenze olandelayo useLubumbashi ngempelasonto kodwa ngoLwesibili ntambama AmaZulu azodlala oweDStv Premiership neTS Galaxy eMbombela Stadium, ngaphambi kokunyukela eCongo.
KwiMazembe, Usuthu lungene lwazi ukuthi lubhekene nezinye zezingqwele zalo mqhudelwano kwazise ingomhlezekhona.
IMazembe ekubeni iqembu lasekhaya lona kuyisizini yalo yokuqala lidlala kulo mqhudelwano, isiwunqobe kahlanu lo mqhudelwano kanti eminyakeni yakamuva kube ngo-2009, 2010 nango-2015.
ICaf Confederation Cup, AmaZulu nayo angakaze ayidlale kanti iMazembe isiyinqobe kabili ngo-2016 nango-2017.
Nokho iMazembe ize eThekwini, isiwazi wazi kahle umlando wakamuva wokuthi idlala neqembu eliqede isizini edlule, lisendaweni yesibili kwilog yenye yamaligi athathwa njengamakhulu e-Afrika, iDStv Premiership.
Ibiyazi ukuthi izobhekana neqembu ngesizini edlule elifike kuqala emaphuzwini angu-50 eligi lidlula iMamelodi Sundowns esizakhele igama njengezinye izikhondlakhondla zase-Afrika.
Ibiyazi ukuthi izobhekana neqembu elicijwa yinsephe ephethe irekhodi lamagoli amaningi emlandweni weBafana Bafana, uBenni McCarthy.
Ibiyazi ukuthi yize kuyiqembu eliqalayo ukudlala kwiCaf kodwa selizibonakalisile ngokudlula kwiNyasa Big Bullets yaseMalawi, efike yadlula ngo 1-0 eThekwini yabe isimbozwa ngo 3-1 esibayeni sayo.
Ngenxa yakho konke lokho, bekufanele ifike eMzansi izilungeselele nokho-ke, akukho okutheni okubonakele ngesiwombe sokuqala abebengathumela ngakho isikhahlamezi noma isigijima ekhaya.
Abanye abantu bathi iMazembe ayisafani neyakudala njengenqwaba yamaqembu anodumo ase-Afrika, iqiniso wukuthi izolo yize kuphele imizuzu engu-80 kungekho qembu elinethuba elibambekayo legoli, abadlali baMaZulu baqinise idolo ngokuthi bazosheshe basijwayele lesi sigaba, ikakhulu uma bengadlulela esigabeni samaqoqo.