Lokhu kungenxa yokuphendula amatafula kwe-Ajax Cape Town ejikele esiswini iTshakhuma Tsha Madzivhandila emdlalweni obuseBidvest Stadium izolo ntambama.
Igoli leTshakhuma livalelwe phakathi nguThembisani Nevhulamba esiwombeni sokuqala. Awe-Ajax ashaywe nguSiphesihle Mkhize, Eleazar Rodgers (amathathu), Chumani Butsaka esiwombeni sesibili.
Ngaphambi komdlalo bekubukeka izozidlela amahlanga iBlack Leopards eqede endaweni ka-15 kwi-Absa Premiership emuva kokuwina imidlalo emibili kuma-Play-Offs. Lokhu bekuyibeke esicongweni se-log ngamaphuzu ayisithupha. Nokho kushintshe konke izolo emuva kokuwina kwe-Ajax, nayo esinamaphuzu ayisithupha, yagibela esicongweni ngenxa yamagoli amaningi. Uma i-Ajax ihlula iLeopards emdlalweni ozoba ngoLwesihlanu eRand Stadium, amehlo wonke azobheka umphumela womdlalo wokugcina okuzobhekana kuwo iLidoda Duvha neTshakhuma eFNB Stadium ngoMsombuluko.
Emdlalweni wayizolo i-Ajax iqale ngegiya eliphezulu ifuna ukushaya igoli kuqala kodwa yehluleka. Kunalokho kube yiTshakhuma ethole igoli ngomzuzu ka-12 ngesikhathi uNevhulamba enameka phakathi ibhola eligotshwe kwesokudla. Emuva kwaleli goli, iTshakhuma ibuye iphindelela, izama ukujezisa i-Ajax ebikade isinamaphutha emuva ngenxa yokuxhamazela. Ithuba elicacile le-Ajax kulesi siwombe liwele umakadebona * -Elezar Rodgers ongqofe ibhola likaKeagan Johannes kodwa walivimba unozinti weTshakhuma, uTshepo Ramaele, sekuvalwe amehlo.
Esiwombeni sesibili i-Ajax ibuye ngendlela ebikade iqale ngayo umdlalo. Ngomzuzu ka-46 uMkhize uyishayele elokuqala emuva kwesibhudubhudu ebhokisini kukade kuyi-free kick. Emuva kwemizuzu emine, uRodgers uqobele phakathi ibhola ebeligotshwe nguCohen Stander kwesokunxele. Ngesikhathi iTshakhuma isadidekile, uStander uphinde wagamanxa kwesokunxele, wagingqela uRodgers walibhajiswa enethini ngomzuzu ka-53. UButsaka ushayele i-Ajax elesine ngomzuzu ka-60. Ngoka-64 unompempe uThando Ndzandzeka uyikhombe emlotheni emuva kokuthi umdlali weTshakhuma ebambe ibhola ngesandla ebhokisini. URodgers uyibeke phakathi leyo phenathi.