Sithembiso Mkhize
OWAYEGIJIMA kwiKaizer Chiefs uJunior Khanye akayizwa kahle eyokufaka uSamir Nurkovic ohlwini lwabadlali abangase badle umklomelo wokuba umdlali ovelele ngesizini edlule ye-Absa Premiership.
UKhanye osezidalele amazinyo abushelelezi kwabanye abalandeli beChiefs ngenxa yemibono yakhe ngaleli qembu, utshele Isolezwe ukuthi ukuba kuya ngaye ngabe iPSL ayiwukhiphi kulo nyaka lo mklomelo, akekho omfanele.
Uhlonze iCovid-19 njengembangela yokwehla kwezinga lokudlala.
Uthe umgqigqo wabadlali ababhekiwe abanjengoThemba “Mshishi” Zwane weMamelodi Sundowns, Gabadinho Mhango we-Orlando Pirates, nabanye ubuye sekusele imidlalo emibili kusongwe isizini.
UKhanye owayedume ngomjiko enkabeni yesisu seChiefs, uthe uma kuphoqa ukuthi umklomelo ukhishwe, angawunikeza uMhango obambane noPeter Shalulile obedlala kwiHighlands Park ngokushaya amagoli amaningi awu-16 kwiligi.
Uthe uZwane angamnika owePlayers’Player of the Season.
Kulabo abafaka uNurkovic ohlwini lwabagaqele owokuba umdlali wesizini, uKhanye uthe akasondeli nakusondela. UNurkovic ushayele iChiefs amagoli awu-13 kwiligi.
“ Hhayi kabi, uNurkovic kusamele asebenze kanzima. Mina ngifuna ukubona eba mnandi nasezinyaweni akangagcini nje kuphela ngekhanda. Ngimbona ezoba nenkinga ngesizini ezayo, amajita aseyibambile indlela adlala ngayo. Mina ngihamba noMhango ekuhambeni nowomdlali wesizini. UZwane ngingamnika owePlayers’ Player of the Season,” kubeka uKhanye ogcine ukubonakala edlala kwiMaritzburg United ngo-2013.
UKhanye ube sematheni ehlaziya ibhola kwi-IDiskiTV kuYou Tube nalapho abelokhu ekusho njalo ukuthi iChiefs ngeke iyinqobe iligi ngenxa yebhola elidlalayo.
Kulabo abathi uhlale egxeka iChiefs ngoba enegqubu ngayo uthe bakhuluma into abangayazi. Uthe ukukhuluma iqiniso kuhlukene kunokuba negqubu. UKhanye uveze ukuthi okuhle ukuthi washo kusasele imidlalo ewu-15, iChiefs ihamba phambili ngamaphuzu awu-13 ukuthi ngeke iyinuke iligi.
“Ngangisho lokhu ngoba ngibona indlela edlala ngayo. Bekuba yinhlanhla uma iphaselane ibhola kasishiyagalolunye. Ibihlasela ngendlela eyodwa, yamakhona noma ama-free kick.Bekuba amabhola aphezulu kuthenjwe uNurkovic. Ngasekupheleni komdlalo ibifaka uDumsani Zuma. Beyingekho inhloso ku-Ernest Middendorp. Ungamdlalisa kanjani umuntu ofana noWillard Katsande? Laphaya kudingeka umuntu omnandi. Uma seyenza kahle iChiefs ngiyoyincoma. anginanxa nayo,” kusho uKhanye. Uveze ukuthi kungenzeka athushuke kwiPremiership ngesizini ezokwethwasa. Uthe kukhona amaqembu akhuluma nawo.