SITHEMBISO MKHIZE
USIHLALO weMaritzburg United, uFarouk Kadodia, uthi bazohlala phansi, bacwaninge imbangela yokujwayelwa wumkhuba wokuhlale bevika izembe.
Kube injabulo yodwa kubalandeli banobhutshuzwayo KwaZulu-Natal, izembe lingagadli kumaqembu akulesi sifundazwe ayibamba kwiDStv Premiership.
Bekubanjwe umoya ngeTeam of Choice ehlale emaqenjini abesemsileni iqala isizini ka-2020/21.
Nakuba ngesizini ka-2019/20 yasongwa ikweyesikhombisa, kulokhu iqede ikweyesi-13, ngamaphuzu awu-30. Kowokugcina ibambane ngeqanda nomkhaya bayo, AmaZulu kobuseHarry Gwala Stadium, ngoMgqibelo.
Ukuba nesizini embi ngalolu hlobo, iMaritzburg yayikugcine ngeka-2018/19 ibuya emidlalweni yokuhlunga iqeqeshwa u-Eric Tinkler. Enye eyaba yimbi ngeka-2015/16, isonga ikweyesi-14.
Kulokhu iqembu eliya kweyokuhlunga iChippa United esonge isendaweni ka-15, ngamaphuzu awu-27.
I-Black Leopards idliwe yizembe.
"Iyasijwayela le nto yokuthi kuwo wonke amasizini silwele ukuvika izembe. Sifike senze kahle kule sizini kuthi kwelandelayo sibe enkingeni efanayo. Uma kuzohlale kunjena ngeke sikuthokozele ukudlala esigabeni esikhulu. Angazi ngingakuchaza kanjani ukuphatheka kabi nokutatazela ebenginakho kule midlalo emine yokugcina. Imiphumela yayo iyona ecacise okuningi. Kuyangijabulisa ukuthi sigcine silivikile izembe kodwa kuzomele sihlale phansi sibheke imbangela yokuhlale sivika izembe. Mhlawumbe inkinga ikuthina, kuzomele sizihlole thina uqobo. Isimo esenzeke kwisizini ka-2020/21 kangisidingi kweka-2021/22. Nathi sidinga ukubalwa namaqembu aphezulu,“ kusho uKadodia.
UKadodia obezwakala ukuthi uthokozile, uthe ziningi izinto ezibe nomthelela wokuba nesizini embi.
"Phakathi kwalezi zinto wukushintshwa kwabaqeqeshi, ezinye ngeke ngizidalule. Nokungabi bikho kwabalandeli kungenzeka ukuthi kube nomthelela. Abalandeli bethu bayinsika yeqembu, bahlale beseseka kukhona konke. Nokho angeke ngaphika ngalokhu, namanye amaqembu abedlala ngaphandle kwabalandeli.“
Mayelana nezinhlelo zesizini ezayo, uthe: "Kuzoba nezinkulu izinguquko ngesizini ezayo. Sizongena sigxile emakethe, sizoqinisa zonke izindawo. Njengoba sengishilo, lesi simo esiphuma kuso kangisidingi ngesizini ezayo. Okunye okungithokozisayo ukuthi nomqeqeshi (Ernst Middendorp) uzoyiqala isizini, akwazi ukuthola isikhathi sokuyilungiselela. Imininingwane eminingi ngizoyidalula uma sesihlale phansi nomqeqeshi, sadweba uhlelo lwesizini ezayo.“
Lesi sikhulu sibe sesibongela AmaZulu ngokuthola ithuba lokuyodlala kwiCaf Champions League. Asonge esendaweni yesibili.
Siphinde safisela iRoyal AM neRichards Bay ukuthi bagcine bengenile kwiDStv Premiership.
Sithe ukwanda kwamaqembu akulesi sifundazwe esigabeni esiphezulu kuzokwenza zibe lula izinto.