UMDLALO wamanqamu eNedbank Cup ozoba kusasa phakathi kweKaizer Chiefs ne-Orlando Pirates uyithuba labaqeqeshi bala maqembu, uNasreddine Nabi noJose Riveiro, lokuthi bazifake ezinhliziyweni zabalandeli nasemlandweni wala maqembu ngokuwanqobela lesi sicoco.
Bobabili banawo amava okuhola amaqembu kweyamanqamu kumaligi ehlukene kwizwekazi i-Afrika njengoba befike amahlandla amaningi kulesi sigaba eminyakeni edlule.
UNabi wanqoba izicoco ezimbili zeTanzanian Cup neqembu lakhona, iYoung Africans, ngesizini ka-2021/22 nango-2022/23. Waqala ngokushaya iCoastal Union kumaphenathi ngemva komdlalo owaphela zibambene ngo 3-3, waqumba phansi i-Azam FC ngo 1-0 ngonyaka olandelayo.
Ngesizini ka-2022/23 wafinyelela kowamanqamu weCaf Confederation Cup neYanga kodwa banqotshwa yi-USM Alger yase-Algeria.
IYanga yashayelwa ekhaya ngo 2-1 emlenzeni wokuqala, yanqoba ngo 1-0 ekuhambeni kowesibili. Nakuba kwaphela ngo 2-2 uma ihlanganiswa yomibili kodwa i-USM yanqoba ngenxa yokushaya amagoli amabili ekuhambeni.
Ngesizini ka-2023/24 lo mqeqeshi odabuka eTunisia, waphinde wangena kowamanqamu weMoroccan Throne Cup esecija i-AS FAR, kulokhu baqunjwa phansi yiRaja Casablanca ngo 2-1.
"Kumasizini amahlanu edlule, lona sekuwumdlalo wami wamanqamu wesihlanu. Ngicabanga ukuthi nginesipiliyoni kowamanqamu. Udinga ukuzithiba nokuzotha futhi awukwazi ukugqashula ngaphansi kwengcindezi emidlalweni enjalo. Ngiyaqonda ukuthi kufanele ngenzenjani uma kukhulunywa ngamasu, ingqondo nokusiza abadlali,” uphawule kanje uNabi ngaphambi kowakusasa weNedbank Cup.
Uma uNabi engaqeda isomiso seminyaka eyishumi sezindebe kuleli qembu lasePhefeni, akubuzwa ukuthi kungasuleka wonke amaphutha asenziwe yiqembu lakhe selokhu efikile ekuqaleni kwale sizini, aseholele ekutheni abanye abalandeli bangabaze ukuthi nguyena ozobuyisa izinsuku zokujabula.
Irekhodi likaRiveiro kweyamanqamu lihle njengoba esayinqobe yomihlanu asefinyelele kuyona selokhu afika kuleli ngesizini ka-2022/23.
Wathatha izicoco ezintathu zeMTN8, eguqisa AmaZulu FC ngo 1-0, iMamelodi Sundowns kumaphenathi emdlalweni owaphela ngo 0-0, neStellenbosch FC ngo 3-1 ekuqaleni kwale sizini.
Akakaze ahlulwe nakwiNedbank Cup selokhu afika kwezikaMagebhula kwazise usesidle kabili lesi sicoco, eshaya iSekhukhune United neMamelodi Sundowns kweyamanqamu, bobabili ebathela phansi ngo 2-1.
"Ukunqoba izicoco kuwumsebenzi omude, akuyona into eyenzeka ngosuku. Sakwazi ukusheshe sikhombise ukuthi sihlose ukulwela izicoco ngokunqoba indebe yethu yokuqala ngemuva kwezinyanga ezimbalwa sindawonye, futhi asimanga lapho kodwa siqhubekile nokulwela ezinye. Lokhu asikwenzi ngezifiso nje kodwa sisebenza kanzima ngokubambisana njengeqembu,” usho kanje uRiveiro ebuzwa ngerekhodi lakhe elihle emiqhudelwaneni yomkhumulajezi.
Njengoba sekwaziwa ukuthi lo mqeqeshi waseSpain uyazishiya eZimnyama ekupheleni kwesizini, ukuthatha le ndebe yeNedbank okwesithathu kulandelana kungamfaka emabhukwini omlando kwazise alikho elinye iqembu elake lakwenza lokho.
IPirates yakhe yayinqoba kathathu kulandelana ngeminyaka yawo-1970 isabizwa ngeLife Challenge Cup.