UMane uvikele isithunzi se-Afrika kowamanqamu we-Afcon
ISENEGAL ibe ngompetha base-Afrika inqoba iMorocco kowamanqamu we-Africa Cup of Nations ngeSonto ebusuku.
Image: BACKPAGEPIX
ISILOMO saseSenegal, uSadio Mane, siveze ukuthi okuholele ekutheni sinxenxe ozakwabo babuyele enkundleni bezoqedela umdlalo wamanqamu we-Afcon bekuwukuvikela isithunzi sebhola lase-Afrika.
ISenegal ibe ngompetha balo mqhudelwano ngesikhathi iguqisa osokhaya iMorocco ngo 1-0 kwi- extra time ngegoli elishaywe nguPape Gueye ePrince Moulay Abdellah Stadium, eRabat.
Umdlalo ucishe waphela ngendlela engajwayelekile ngesikhathi abadlali beSenegal bephuma enkundleni kulandela ukunikwa kweMorocco iphenathi ngasekupheleni kwesiwombe sesibili.
Ngemuva kokubukisisa isigameko kwi-Video Assistant Referee (VAR), unompempe waseDemocratic Republic of Congo, uJean-Jacques Ndala, ulikhombe emlotheni, esola umdlali weSenegal, uMalick Diouf, ngokudonsa uBrahim Diaz ebhokisini.
Kwenzeka lokho nje, ubesanda kuphika igoli leSenegal ebelibekwe enethini ngekhanda u-Ismaila Sarr ngenxa yokuthi ubone u-Abdoulaye Seck edudula u-Achraf Hakimi ebhokisini.
Lezi zigameko ziholele ekutheni umqeqeshi weSenegal, uPape Thiaw, atshele abadlali bakhe ukuthi baphume enkundleni, abalandeli basala beshaqekile.
Nokho, uMane uphinde wabancenga ozakwabo, abanye babo ebalanda egunjini lokushintshela, umdlalo wagcina uqhubekile.
UDiaz uyena onikwe umsebenzi wokukhahlela iphenathi, wazama ukutayela, unozinti weSenegal u-Edouard Mendy walibamba kalula ibhola.
Kuthe kusadlalwe imizuzu emine kwi-extra time, uGueye walibeka phakathi ishodi lakhe, iMorocco yangabe isakwazi ukubuya.
“Bekuzoba yihlazo elibi ukuthi umdlalo wamanqamu uphele ngale ndlela. Bekuzoshiya isithombe esibi emhlabeni wonke. Ibhola lase-Afrika selithuthuke kakhulu futhi besibukwa umhlaba wonke,” usho kanje uMane ekhuluma nezintatheli ngemuva komdlalo.
“Bengibona kungcono ukuthi sihlulwe enkundleni kunokuthi sihlulwe ngale ndlela. Yilokho okwenze ngayobalanda ozakwethu.”
UMane uyena ophakamise indebe ye-Afcon abeseyinqoba okwesibili njengoba asiza iTeranga Lions ukuthi inqobe isicoco sayo sokuqala ngo-2021.
“Ngijabule kakhulu ngoba sekufezeke elinye iphupho lami. Ngihlezi ngizimisela uma ngidlalela iqembu lesizwe. Angikwazi ukuchaza indlela engijabule ngayo.
ISenegal izovikela indebe ye-Afcon ngonyaka ozayo emqhudelwaneni ozobanjelwa eKenya, Uganda naseTanzania.