Sizobangwa yiSenegal neMorocco ese-Afcon
UMDLALI weSenegal, uSadio Mane, ejabulela igoli alishaye benqoba i-Egypt kowandulela owamanqamu kwi-Africa Cup of Nations.
Image: BACKPAGEPIX
OSOKHAYA iMorocco bazobhekana neSenegal kowamanqamu we-Africa Cup of Nations kulandela ukudlula kwabo emidlalweni eyandulela owamanqamu ngoLwesithathu.
IMorocco ingene kowamanqamu ngesikhathi inqoba iNigeria ngo 4-2 sekukhahlelwa amaphenathi ePrince Moulay Abdellah Stadium, eRabat. Umdlalo ubuphele zibambene ngo 0-0.
Lo mphumela uchaza ukuthi iMorocco izodlala kowamanqamu okokuqala selokhu yanqoba lo mqhudelwano ngo-1976 ekhaya.
ISenegal iyona engene kuqala kowamanqamu iguqisa i-Egypt ngo 1-0 eStade de Tanger, edolobheni iTangier.
Lo mdlalo bekungowamagqubu kwazise la maqembu adlala kowamanqamu e-Afcon ngo-2021, kwanqoba iSenegal kumaphenathi.
USadio Mane ubeke iLions of Teranga phambili ngomzuzu ka-78, iPharaohs yangabe isakwazi ukubuya.
I-Egypt neNigeria sebezobanga izindondo zethusi eMohammed V Stadium, eCasablanca, ngoMgqibelo ngo-6 ebusuku.
ISenegal neMorocco bazolwela isicoco eePrince Moulay Abdellah Stadium, eRabat, ngeSonto ngo-9 ebusuku.