Luyasuka ushikishi lokuvikela iNedbank kwiChiefs
NGEZIKHATHI ezimnandi ngesizini edlule kwiKaizer Chiefs engakaxoshwa uNasreddine Nabi ophethe inkomishi yeNedbank
Image: SIGCINIWE
IKAIZER Chiefs izokwazi kusasa ukuthi yiliphi iqembu elizoba ngelokuqala ukuma endleleni yayo ebheke ekuvikeleni isicoco seNedbank Cup esidle kwi-Orlando Pirates ngesizini edlule.
Lesi sicoco seChiefs sibe mqoka kwazise besiqeda indlala yezinkomishi ebisijuqe Amakhosi iminyaka engu-10.
Izolo, iPremier Soccer League (PSL) iqinisekise usuku nesikhathi sokuqhathwa kwamaqembu azogadulisana kwi-Last 32 yalo mqhudelano emcimbini ozoba kusasa ngo-6.30 ntambama, eSandton, eGoli.
Ngokohla lwemidlalo ye-PSL kwisizini ka-2025/2026, iKe Yona izoqala ngoFebhuwari 4 lapho amaqembu angu-16 eBetway Premiership ezoqhathwa khona nayisishiyagalombili eMotsepe Foundation Championship namanye ayisibalo esifanayo avela kuma-amesha.
Njengoba iBafana Bafana ingaseyona ingxenye ye-Africa Cup of Nations (Afcon) kulandela ukuphuma kwayo kwi-Last 32 emasontweni adlule, abathandi bebhola laseMzansi abasakwazi ukulinda ukuthi kubuye lokhu abakujwayele.
Ngaphambi kweNedbank Cup, kuzoqala imidlalo yeligi ngoJanuwari 20.
Nakuba iChiefs ingawuvalanga kahle unyaka kodwa kayikho kude ne-Orlando Pirates okusongwe unyaka iqhwakele.
Amabamba eChiefs uKhalil Ben Youssef noCedric Kaze abanawo uphawini wokungadluli kwi-Last 32 yeNedbank kwazise lo mqhudelwano sekuyiwona wodwa osele uma kukhona leli qembu laseNaturena elifuna ukukufaka ekhabetheni ngaphandle uma lidla isicoco seligi ngoMeyi 23 nonyaka.