Umgadli wePirates neqhinga lokuketula iSundowns
ESINYE sezethenjwa ze-Orlando Pirates, uTshepang Moremi (omaphakathi), ejabula nozakwabo u-Oswin Appollis noCemran Dansin.
Image: BACKPAGEPIX
UKUGQISHA ngabadlali abangawazi umuzwa wokuwina isicoco seligi kwe-Orlando Pirates yikhona okuzosebenzela leli qembu laseSoweto, njengesikhuthazi emjahweni walo wokukhala lemuke nenkomishi yeBetway Premiership kule sizini.
Lawa ngamazwi kaTshepang Moremi ongomunye wabadlali okubhekwe lukhulu kubona uma iPirates ifuna ukugcina iyiketulile iMamelodi Sundowns esisiphendule esayo isicoco seligi enkulu yaseNingizimu Afrika.
UMoremi, owayeneminyaka engu-11 ubudala ngesikhathi iPirates igcina ukuqukula isicoco seligi ngo-2011/2012, ubekhuluma nabezindaba ngesikhathi iBafana Bafana ibuyela eMzansi kulandela ukuguqa kwayo kwiLast 16 ye-Africa Cup of Nations (Afcon) eqhubekayo eMorocco.
Ngaphandle kukaSipho Mbule, akekho umdlali osesikwatini sePirates onendondo yesicoco seligi yebhola elikhokhelayo laseNingizimu Afrika. UMbule unezimbili neSundowns.
Yile ndlala yeminyaka yesicoco seligi kwiPirates eyenza uMoremi akholelwe ekutheni iqembu lakhe ngeke lithambise kunoma yiliphi elizozama ukuligudluza esicongweni se-log njengoba iligi yaseMzansi ibuyela ensimini emasontweni amabili.
Kuyiwe ekhefini le-Afcon iPirates, ephekwa ngu-Abdeslam Ouaddou, iqhwakele kwi-log. Lokho kuyenza ithishwe kwazise ngokomlando weligi yaseMzansi iqembu eliqeda unyaka liseqhulwini livamise ukugoduka nesicoco.
“Kunentshisekelo engaphakathi yokulwa nakakhulu ukuqinisekisa ukuthi njengoba sisesicongweni kasisasuki kuze kuphele isizini,” kusho uMoremi.
“Cishe sonke esikwatini kasiwazi umuzwa wokuqukula isicoco seligi ngakho-ke ngeke sivume kalula ukugudluka esicongweni ngisho ngabe ubani uzamani. Lokhu kufanele sikusebenzise njengesikhuthazi nesikhumbuzo ngaso sonke isikhathi.
“Ngiyakholelwa ekutheni impumelelo kweminye imiqhudelwano kumasizini adlule ibisicijela le sizini ngakho-ke ngeke siliyeke ithuba esilinikiwe
“Siyazi ukuthi kunjani ukuwina ezinye izicoco okuzosisiza ngokwesipiliyoni kodwa ukungawazi kwethu umuzwa wokudla iligi kuzosisiza ukuthi siqhubeke ngisho kungasavumi,” kuqhuba uMoremi oneminyaka engu-25 ubudala.
Lo mdlali ubengomunye wenqwaba yabadlali bePirates abebeseMorocco neBafana esingabala kubona uMbule, Oswin Appollis, Thalente Mbatha, Relebohile Mofokeng, Nkosinathi Sibisi noSipho Chaine uma engabalwa uMbekezeli “TLB” Mbokazi osejoyine iChicago Fire edlala kwiMajor Soccer League (MLS) yase-United States of America (USA).