Kubhedile iBafana ikhishwa kwi-Afcon
UMDLALI weBafana Bafana uRelebohile Mofokeng emakene nowaseCameroon uBryan Mbeumo.
Image: BACKPAGEPIX
IBafana Bafana iwashiswe ijezi kwi-Africa Cup of Nations iguqiswa yiCameroon ngo 2-1 e-Agdal Medina Stadium, edolobheni iRabat, eMorocco.
Umqeqeshi uHugo Broos wenze izinguquko ezine eqenjini elinqobe iZimbabwe emdlalweni wokugcina wamaqoqo.
USamukele Kabini, uNkosinathi Sibisi, Bathusi Aubaas noRelebohile Mofokeng bathathe izindawo zika-Aubrey Modiba, Sphephelo Sithole, Tshepang Moremi noSipho Mbule.
IBafana iwuqale kahle umdlalo uMofokeng noKabini bethola namathuba okushaya amagoli kodwa bangayibhakuzisa inethi.
ICameroon ihambe phambili ngomzuzu ka-34 ngesikhathi iBafana ihluleka ukukhipha ibhola ebhokisini, lawela kuJunior Tchamadeu kwesokunxele, walibeka phakathi.
Kuthe kusanda kubuywa esiwombeni sesibili iqembu lakuleli laphisana ngebhola engxenyeni yalo yenkundla, uMichael Kofane walingqomfela phakathi ibhola ebeligotshwe ngakwesokunxele.
IBafana izamile ukubuyela emdlalweni ngomzuzu ka-88 ngegoli elibekwe enethini ngu-Evidence Makgopa, ongene esiwombeni sesibili.
Ibe seyizama ukuthola igoli lokulinganisa emizuzwini yokugcina kodwa kwangalunga.
ICameroon isizobhekana nosokhaya iMorocco kuma-quarterfinal ngoLwesihlanu ebusuku.