Ziyavuma izikhathi zokubuka iBafana kwiNdebe yoMhlaba
NGABALANDELI beBafana Bafana abanethemba ngeqembu labo kwiNdebe yoMhlaba e-USA, Mexico naseCanada ngonyaka ozayo
Image: Sydney Mahlangu/BackpagePix
WUMDLALO wokugcina weBafana Bafana ku-Group A weNdebe yoMhlaba neSouth Korea kuphela ozophoqa abalandeli baseMzansi ukuthi bavuke kusempondo zankomo kwazise uzodlalwa entathakusa ngokwesikhathi saseNingizimu Afrika.
Emuva kokuqhatha amaqoqo ngoLwesihlanu oludlule eWashington DC, e-United States of America (USA), i-Fifa ilandelise ngokukhipha uhla lwemidlalo nezinkundla okuzodlalelwa kuzona kanjalo nezikhathi.
IBafana ifakwe ku-Group A nosokhaya iMexico, South Korea neqembu lesizwe elilodwa phakathi kweDenmark, Czech Republic, North Macedonia neRepublic of Ireland abazodlala eyokuhlunga ngoMashi wonyaka ozayo.
Ukugqagqana kwezikhathi phakathi kweNingizimu Afrika ne-USA, Mexico neCanada bekwenza kube nongabazane ngezikhathi okuzobukwa ngazo imidlalo yeBafana kulo mqhudelwano.
Kuzoba wumdlalo wokugcina weqoqo neSouth Korea kuphela ozokwenza abathandi beBafana basheshe bavuke uma bengazimisele ngokuxoxelwa.
Kowokuqala okungowukuvula umqhudelwano, iBafana izobhekana neMexico ngoJuni 11 e-Estadio Azteca, ekomkhulu lakuleliya lizwe iMexico City. Lo mdlalo uzoba ngo-10 ebusuku.
Kuzolandela ozoba ngoJuni 18 e-Atlanta, e-USA ngo-7 ebusuku nezwe elizonqoba imidlalo yokuhlunga phakathi kweDenmark, North Macedonia, Czech Republic neRepublic of Ireland.
Owokugcina nokuyiwona ozobavusa ezintatha abalandeli beBafana uzoba ngoJuni 25, eMonterrey, eMexico ngo-4 ekuseni.
Kungenzeka lo mdlalo kube yiwona omqoka kunayo yonke kwiBafana kulo mqhudelwano kwazise ungase uphendle indawo kwi-Last 32 okuyisigaba somkhumulajezi njengoba umqhudelwano wakulokhu uthakwe ngamazwe angu-48.
IBafana ayikaze idlule kweyamaqoqo emlandweni wayo kwiNdebe yoMhlaba esiyidlale amahlandla amathathu ngokwahlukana eFrance 1998, Korea/Japan ngo-2002 nango-2010 eMzansi.