UCardoso ubalisa ngokuthwaliswa isiphambano angasazi eMzansi
UMQEQESHI weMamelodi Sundowns, uMiguel Cardoso, okhononda ngokukhishwa inyumbazane ebholeni laseNingizimu Afrika
Image: BACKPAGEPIX
UBALISE ngokukhishwa inyumbazane selokhu afika ebholeni laseNingizimu Afrika, uMiguel Cardoso, okunezimpawu zokuthi uhleli ngesinqe esisodwa kwesokuqeqesha iMamelodi Sundowns ngenxa yendlela leli qembu elisonge ngayo isizini edlule neliqale ngayo entsha.
UCardoso obekusobala ukuthi uyafuthelana yintukuthelo, ukusho lokhu esithangamini nabezindaba ngemuva komdlalo wezakhe neKaizer Chiefs ophele zibambene ngo 0-0 ngoLwesithathu ebusuku, e-FNB Stadium, eNasrec.
Isizini edlule isongwe kunemvunge ngendlela iSundowns eyeke ngayo ithuba lokwengeza inkanyezi yesibili ejezini layo ngokuvumela ukushaywa yiPyramids FC yase-Egypt kowamanqamu weCaf Champions League.
Emidlalweni eyisikhombisa emiqhudelwaneni eyahlukene kusukela kuqale isizini, iSundowns isiwine emithathu yadlala ngokulingana kwemine.
Ngesikhathi ebezindaba bebuza uCardoso ukuthi uyavuma yini ukuthi iphuzu kwiChiefs lisindise umsebenzi wakhe, ubhoke ngolaka.
“Ngicela kulandele omunye umbuzo ngoba angifuni ukuthi umuntu abukise ngami,” uphendule kanje.
Lo mqeqeshi uqhube wathi akazi ukuthi yini lena ayidlela bani ebholeni laseNingizimu Afrika ephoqa ukuthi yena angahlulwa.
“Icala lami wukudlala ngokulingana amahlandla amabili kulandelana ne-Orlando Pirates neKaizer Chiefs? Kungani abanye abaqeqeshi bevumelekile ukudlala ngokulingana kodwa hhayi mina?
“Mhlawumbe kukhona abazama ukungicindezela ngokuthi ngibambane nala maqembu amabili amakhulu kodwa kababoni ukuthi bayangincoma ngoba indlela la maqembu aqinise ngayo iyamangalisa.
“Angazi ngempela ukuthi kungani kubhekwe okuhlukile kimina ekubeni namanye amaqembu ayithola imiphumela engancomeki kodwa abaqeqeshi bawo kababuzwa imibuzo eqosheme njengoba kwenzeka kimina,” kusho uCardoso.
Lo mqeqeshi wasePortugal ukhala nje, kusasa kumele adambise ulaka lwabalandeli ngomdlalo weBetway Premiership abazowudlala neStellenbosch FC ngo-3 ntambama, e-Athlone Stadium, eKapa.