Akucaci ngokubuya komqeqeshi weChiefs

KUSEMNYAMA ngokubuya komqeqeshi weKaizer Chiefs, uNasreddine Nabi, okuqale isizini engekho ebhentshini kulandela ukulimala komkakhe ekhaya eTunisia.

AMakhosi asedlale imidlalo emibili yeBetway Premiership njengoba sekuqale isizini ka-2025/2026, aqoqa amaphuzu ayisithupha. Athele isibhaxu sika 2-0 iStellenbosch FC kowokuvula, alandelisa ngokwehlula iPolokwane City ngo 1-0. IChiefs ibikade yagcina ngesizini ka-2014/2015 isaqeqeshwa nguStuart Baxter ukuwina imidlalo emibili yokuqala yesizini ilandelana. Kuleyo sizini, Amakhosi awina isicoco seligi nendebe yeMTN8.

Ukuqala kahle kweChiefs kujabulise izigidi zabalandeli bayo ababuyelwa yithemba ngokubuya kwezinsuku zenjabulo. Njengoba engekho uNabi, izintambo zokuqeqesha zibanjwe ngamaphini akhe okunguCedric Kaze noKhalil Ben Youssef. Ngesonto eledlule, uKaze ukuqinisekisile ukuthi uNabi ukwazi konke okwenzekayo ekhempini yaMakhosi kwazise bayaxhumana naye phezu kokuba ezinye izinqumo zithathwa yibona njengabantu abaqeqesha abadlali nsuku zonke.

Umthombo utshele leli phephandaba ukuthi akwaziwa namanje ukuthi uNabi uzobuya nini.

"UNabi uyaxhumana neqembu kodwa akukho okukhomba ukuthi usezobuya. Akwaziwa ukuthi uzobuya nini okwamanje. Akukho nokucabangela ukuthi angase ebuye nini," kusho umthombo.

Ukwenza kahle kweChiefs engekho uNabi kwamukelwe ngezindlela ezahlukene ngabalandeli ezinkundleni zokuxhumana. Kukhona abasho sakuntela ukuthi akasale eseqhubeka ahlale nomkakhe, iqembu libanjwe nguKaze noYoussef.

Amakhosi azobuyela enkundleni kusasa uma eseyobhekana neRichards Bay FC emdlalweni wePremiership eFNB Stadium, eNasrec, ngo-7.30 ebusuku. Akubuzwa ukuthi azolwela ukuqhubeka nokuqoqa amaphuzu njengoba ebheke ukwenza kahle kule sizini. IBay ibalwa namaqembu angakawini nowokubika umdlalo weligi kule sizini. Ikhale ngaphansi kwiMarumo Gallants ngo 2-1 kowokuvula weligi ngaphambi kokuthelwa othulini yiLamontville Golden Arrows. Ngaphambi kwemidlalo yeligi, iNatal Rich Boyz yehlulwe yiMamelodi Sundowns ngo 4-0 kuma-quarterfinal eMTN8.

Imidlalo yeBetway Premiership 

Kusasa

Kaizer Chiefs v Richards Bay FC (FNB Stadium, 7.30pm); Orbit College v Sekhukhune United (Dobsonville Stadium, 7.30pm); Durban City v Golden Arrows (Chatsworth Stadium, 7.30pm); Chippa United v TS Galaxy (Buffalo City Stadium, 7.30pm); Siwelele v Polokwane City (Lucas Moripe Stadium, 7.30pm)

NgoLwesithathu

Orlando Pirates v Stellenbosch (Orlando Stadium, 7.30pm); Magesi v Mamelodi Sundowns (Seshego Stadium, 7.30pm); AmaZulu v Marumo Gallants (Princess Magogo Stadium, 7.30pm)