AbeSekhukhune bacike uTinkler benqoba oweMTN8
IQHAWE leSekhukhune United, uBradley Grobler nozakwabo naye omusha kwiBabina Noko uMiguel Timm, bejabulela elinye lamagoli kowe-quarterfinal yeMTN 8 ne-TS Galaxy ngempelaosnto edlule
Image: BACKPAGEPIX
ESIKHUNDLENI sokujabulela ukungena esigqokweni semidlalo eyandulela eyamanqamu yeMTN 8, umqeqeshi weSekhukhune United, u-Eric Tinkler, usale ebalisa ngokwenzelwa phansi ngabadlali abathile ekubeni bechithe isikhathi esiningi emasontweni adlule belungisa konke okwenza bavuze emuva.
IBabina Noko ibuye kunzima yanqoba ngo 3-2 kwi-TS Galaxy emdlaweni we-quarterfinal yalo mqhudelwano onesheke lika-R10 million ngoMgqibelo, ePeter Mokaba Stadium, ePolokwane.
Ngemuva komdlalo, uTinkler uqome ukubalisa ngamaphutha athe enziwe yizitobha zakhe ezidedele amagoli amabili kaMpho Mvelase noVictor Letsoalo esiwombeni sokuqala kunokujabulela ukuthi iSekhukhune iyaqhubeka kulo mqhudelwano.
Kube wubuqhawe benduku entsha yeSekhukhune, uBradley Grobler obuweze leli qembu ngamagoli amabili ewakhelwe nguKeletso Makgalwa ongatholanga nowokubika emiklomelweni emibili emqoka yePremier Soccer League (PSL) abeqokelwe kuyona.
Amagoli kaGrobler, onezinsuku ezimbalwa efikile kwiSekhukhune esuka kwiSuperSport United esidayiselwe iSiwelele United, alandelwe ngelikaVusimuzi Mncube okube ngelokuwina.
“Enye yezinto ebesigxile kakhulu kuzona njengoba besilungiselela ukuqala kwesizini bekuwukwehlisa izibalo zamagoli angenga ngakithina yingakho ngiphoxekile,” kusho uTinkler esithangamini nabezindaba.
“Okunginenga kakhulu wukuthi sidedela la magoli nje, hhayi ngoba sidlala kabi kodwa kunabathile engingaqondi noma bazibona bengcono yini.
“Ngiyazi bekuwumdlalo wokuqala wesizini kodwa kuyaphoxa ukuqaphela ngemidlalo yokuqala umkhuba ongaba yingozi kithina kule sizini ezoqala.
“Ngiyabancoma nokho abadlali bami ngokuzama ukubuyisa umdlalo esiwombeni sokuqala ngoba ukuba asilitholanga igoli sesiyophela ngabe kukhulunywa okunye.
Ngenxa yokuthola igoli abeGalaxy bakhombise izimpawu zokudikibala okwenze saqhamuka namaqhinga okubathwesa obunye ubunzima esiwombeni sesibili.
“Kulapho-ke engiqale khona ukubona iqembu lami. Umdlalo bese siwuphethe ngendlela ebesihlele ngayo yingakho kungazange kwethuse kangako nokuthi sigcine sibuyile.
“Kuningi okusazohlangana kodwa angifuni ukuphinda ngiwuqaphele lo mkhuba engiwubone kwabathile ngoba ezinye izitha ngeke zisinike ithuba lokubuya njengoba kwenze iGalaxy."