OweStellies usabela AmaZulu azofika ‘kuziliwe’ eKapa
UNOZINTI weStellenbosch FC uLee Langefeldt emi noRiaan Hanamub waMaZulu FC ngaphambi kokuthi babhekane kwi-quarterfinal yeMTN 8 eKapa
Image: BACKPAGEPIX
UQWEQWE lukanozinti weStellenbosch FC, uLee Langefeldt, lusabela AmaZulu FC ngokuba yiqembu lokuqala okufanele bakhombise ngalo ukuthi bakulungele ukuthwala ibhola laseWestern Cape emahlombe.
Lo nozinti oseqale izifundo zokupheka onozinti, ukusho lokhu maphakathi nesonto ngesikhathi kwethulwa i-MTN 8 abazoyiqala noSuthu ngo-3 ntambama, eCape Town Stadium, eKapa.
Isinqumo sekomidi lePremier Soccer League (PSL) eliqondisa izigwegwe sokuhlawulisa imali esikhundleni sokuyephuca amaphuzu iMarumo Gallants, kuwashiya emfimfa amathuba eCape Town City okusala neStellies bemele iWestern Cape esigabeni esikhulu sebhola laseMzansi.
Ngokusho kukaLangefeldt, ibhola laseKapa lisekuzileni kulandela okwenzeke kumaCitizens ahluleke ngisho esethole ithuba emidlalweni yokuhlunga nesimo esifanayo kwiCape Town Spurs egencwe yizembe kwiMotsepe Foundation Championship.
IStellies eholwa nguSteve Barker ilokhu liqhubekile nokudlondlobala ebholeni laseNingizimu Afrika kwazise ngesizini edlule iphinde yalala isithathu kwiBetway Premiership.
Ngaphezu kwalokho, iStellies ihambe yaze yafika kweyandulela eyamanqamu kwiCaf Confederation phezu kokuba ibiwudlala okokuqala lo mqhudelwano emlandweni wayo.
“Kuningi okwenza ngiwasabele AmaZulu kulo mdlalo ngoba ungowokuqala ekhaya futhi yiwona okufanele sicacise ngawo ukuthi sikulungele ukuthwala ibhola laseKapa kule sizini,” kusho uLangefeldt kwabezindaba.
“Ukuguqa kwethu kowamanqamu weMTN 8 (kwi-Orlando Pirates) ngesizini edlule, kusenza siye kowoSuthu ngomfutho nokuzethemba.
“Ngabe senza elikhulu iphutha uma singawathatha kancane AmaZulu kodwa ukuzethemba kithina kuphezulu nomsebenzi osihlalele siyabuqonda ubunzima bawo.
“Iqembu (Stellenbosch) liqinise ngabadlali abebedingeka ezindaweni elishiywe kuzona yizinsika ngakho-ke asisakwazi ukulinda yize siqonda ukuthi nezitha zethu zizofika nawazo amaqhinga,” kusho uLangefeldt.
Muva nje, iStellies isanda kushiywa nguFawaaz Basadien ojoyine iMamelodi Sundowns. KwiSundowns uzofica ozakwabo bakudala u-Iqraam Rayners noJaydon Adams.
Ngaphandle kwalaba badlali, iStellies seyadedela uDeano van Rooyen owayewukaputeni waya kwi-Orlando Pirates nomzala wakhe u-Ashley du Preez okwiKaizer Chiefs.