Kuthishwa uSibisi ukuqeda indlala yeseligi kwiPirates
UNKOSINATHI 'Bhodlela' Sibisi othishwa nguLucky Lekgwathi ngokufika esikhundleni nenhlanhla ezokweza leli qembu liqede indlala yesicoco seligi elasigcina ngo-2012
Image: BACKPAGEPIX
UKAPUTENI owagcina ukuphakamisa indebe yeligi kwi-Orlando Pirates, uLucky Lekgwathi, ukhumbuze abaxhumene naleli qembu ngobumqoka bokweseka uNkosinathi “Bhodlela” Sibisi osanda kuqokelwa kwesobukaputeni ngoba kungenzeka kube nguyena ozofika nenhlanhla yesicoco seligi.
Maphakathi nesonto, iPirates imemezele uSibisi njengokaputeni omusha namaphini amabili okunguThapelo Xoki noMbekezeli "TLB" Mbokazi. Lokhu ikwenze ngaphambi komdlalo wayo we-quarterfinal yeMTN 8 nePolokwane City namuhla ngo-3 ntambama, e-Orlando Stadium, eSoweto.
ULekgwathi owayengukaputeni wePirates ngoMeyi ka-2012, ngesikhathi igcina ukudla isicoco seligi ngaphansi komqeqeshi, uRuud Krol, unenkolelo yokuthi uSibisi angase abe yikhubalo lesicoco seligi.
USibisi ubehola eZimnyama emidlalweni eminingi ngesizini edlule kwazise ubengasajwayele ukubonakala enkundleni u-Innocent Maela osewagaxe emgibeni amakhokho.
USibisi owayewukaputeni nakwiLamontville Golden Arrows eminyakeni edlule, uyena obehola iBafana Bafana kaHugo Broos ezinyangeni ezedlule emidlalweni yobungani eyidlale neTanzania neMozambique kwazise ubengekho uRonwen Williams.
Lesi sitobha esisanda kuqokwa njengomdlali wasemuva ovelele, iBetway Premiership Defender of The Season, besinaye uLekgwathi ngesikhathi kwethulwa ngokusemthethweni i-MTN8.
ULekgwathi utshele Isolezwe ukuthi igcagcele esokeni ngoSibisi ngoba ubevele enza umsebenzi omuhle ngesizini edlule.
“Ngokwami i-MTN 8 yangesizini edlule sayiwinelwa nguSibisi kanti kunemidlalo eminingi kwiligi lapho esilamulele khona kukubi,” kusho uLekgwathi.
“Ngikhulumile naye. Uyawuqonda umsebenzi omhlalele kodwa okuhle ngaye wukuthi uzimisele ukubuza kwabaphambili kunaye. Kukhona engikubonayo kuyena.
“Udaliwe ukuba wumholi ngakho-ke ngizwa nginethemba ikakhulukazi uma uzoqhathanisa nesibalo kanjalo nezinga labadlali azobe ebahola.
“Okusobala wukuthi iPirates isiqalile icabanga ngekusasa njengoba isondeze noMbekezeli (Mbokazi). Okunye okungichazile ngoSibisi ukuthi akabhekile ukuwenza yedwa lo msebenzi okuyinto ezomsiza kakhulu. Kuyethembisa futhi kunomuzwa wokuthi mhlawumbe uSibisi nguyena ozoza kulesi sikhundla nenhlanhla yokusiholela esicocweni seligi."
Kuningi okubhekiwe kowanamuhla ngePirates kusukela kumqeqeshi omusha, u-Abdeslam Ouaddou nezinduku zakhe ezintsha esingabala kuzona uSipho Mbule, Sinoxolo Kwayiba, Oswin Appollis, Tsepang Moremi noYanela Mbuthuma ukubala abambalwa.
Imidlalo yeMTN 8:
Namuhla: Orlando Pirates v Polokwane City (Orlando Stadium, 3pm); Sekhukhune United v TS Galaxy (Peter Mokaba Stadium, 6pm)
Kusasa: Stellenbosch FC v AmaZulu FC (Cape Stadium, 3pm); Mamelodi Sundowns v Richards Bay FC (Lucas Moripe Stadium, 6pm)