USlot uzokhangisa ngomshini weLiverpool kwiCommunity Shield
U-JEREMIE Frimpong ongomunye wabadlali abasha beLiverpool okubhekwe lukhulu kubona njengoba kuzoqala isizini entsha
Image: BACKPAGEPIX
AKUSENSUKU zatshwala ukuthi ompetha be-English Premiership, iLiverpool FC, bawukhangise phambi kwabalandeli umshini wabo omusha obunjwe ngezigidi kwiCommunity Shield neCrystal Palace ngo-10 Agasti, eWembley Stadium, eLondon.
Lo mdlalo ozoba phakathi kompetha beligi nabeFA Cup okuyiPalace kulokhu, uzonika umqeqeshi weLiverpool, u-Arne Slot, ithuba lokukhombisa ngezinduku ezintsha zaleli qembu.
ILiverpool kaSlot ithuse abaningi ngesizini edlule ngokuziphuzela isobho ibheke esicocweni ekubeni lo mqeqeshi waseNetherlands ubeqala ukusebenza kule ligi ethathwa njengenye yaphezulu ebholeni lomhlaba.
Okusobala kulokhu wukuthi leli qembu elingajwayele ukusebenzisa imali lizimisele ukungena lishone ephaketheni.
ISITHANDWA sabalandeli beCrystal Palace, u-Eberechi Eze, okungacaci noma uzobe ekuleli qembu ngesizini ezayo noma kumakhelwane i-Arsenal
Image: BACKPAGEPIX
Kumanje iLiverpool ibalwa namaqembu ahamba phambili ngokufaka isandla ephaketheni lithenge abadlali abasha kanti kunezinkomba zokuthi kayiqedile.
Kubadlali abalandwe yiLiverpool njengoba kuvuleke iwindi, singabala oFlorian Wirtz, Jeremie Frimpong, Milos Kerkez noHugo Ekitike, bonke abathengwe ngemali eshisiwe ngokwahlukana kwiBayer Leverkusen yaseGermany, Bournemouth FC yase-England ne-Eintracht Frankfurt yaseGermany.
Kwabebemqoka ngesizini edlule, ngaphandle kukaTrent Alexander-Arnold osedlalela iReal Madrid yaseSpain kusewuLuis Diaz osamenyezelwe njengongaseyena umdlali waleli qembu nosekungumlando ukuthi usesemabhukwini ompetha beBundesliga yaseGermany, iBayern Munich.
Abadlali abafana noJoe Gomes nonozinti u-Allison Becker kabaziqeqeshi ngenxa yokulimala nezinkinga ezibhekene nabo ngqo ngokwahlukana, kanti kubhekiwe nokuthi uzolulama ngesikhathi yini u-Alexis Mac Allister olimele.
Kuzobe kuwumdlalo wokuqala omkhulu lapho iLiverpool izobe idlala khona ngaphandle kukaDiogo Jota owashona engozini yemoto emasontweni adlule.
ILiverpool izodlala isizini ezayo ngejezi elinomgqizo kanombolo-20 obugqokwa yilo mgadli wasePortugal, owashona ehamba nomfowabo u-Andre Silva.
KwiPalace ka-Oliver Glasner okuphele isizini isingelinye lamaqembu angayelwa ngobuso isikwati sisafana yize amanqe ezungeza kubadlali abafana nokaputeni uMarc Guehi okhonjwa kuyona belu iLiverpool no-Eberechi Eze omataniswa ne-Arsenal neChelsea FC bobabili baseLondon.