UMshini wethembise ubisi lweChiefs kwiToyota Cup
UNKOSINGIPHILE 'Mshini' Ngcobo weKaizer Chiefs uthembise abalandeli baleli qembu ingcwenga yebhola njengoba lizobhekana ne-Asante Kotoko yaseGhana, kwiToyota Cup ezodlalelwa eThekwini
Image: BACKPAGEPIX
OKUZOBONWA ngabalandeli beKaizer Chiefs kwiToyota Cup kuzobashiya beloleke ngale ndlela yokuthi ngeke besakwazi ukulinda ukuqala kweBetway Premiership.
Lesi yisethembiso sikaNkosingiphile “Mshini” Ngcobo asenze ngemuva kokuthi leli qembu laseNaturena, liqede amalungiselelo okuqala kwesizini entsha eliwenzele eNetherlands.
Amakhosi azokwamukela i-Asante Kotoko yaseGhana kulo mqhudelwano osubuya okwehlandla lesibili kodwa kulokhu ungoMgqibelo ngo-3 ntambama, eMoses Mabhida Stadium, eThekwini.
Nakuba iChiefs inqobe umdlalo owodwa kwemihlanu eyidlale namaqembu ezigaba ezahlukene zamaligi aseNetherlands kodwa uNgcobo wanelisekile ngakubone ekhempini.
Abalandeli beChiefs bayivale kabi isizini edlule kwazise iqembu labo liqede ngaphandle kwe-Top 8 okwenza lo mdlalo weToyota Cup ubemqoka kubona njengoba bazobe belibukela eduze okokuqala iqembu labo.
IChiefs ingelinye lamaqembu atheze aqinisa njengoba kuvuleke imakethe yokushintshana ngabadlali ngakho-ke lo mqhudelwano uzonika abalandeli ithuba lokubonela eduze nezinduku ezintsha.
UNgcobo ongomunye wabadlali abebeliphakamisile izinga eNetherlands, uthembise abalandeli beChiefs uMshini wakudala lo owawubashaya ngaphakathi.
“Sihlale kahle eNetherlands kanti nalokhu ebesikuyele sikutholile kwazise sidlale namaqembu asesigabeni esithe ukubangcono kunalesi esisijwayele,” kusho uNgcobo ethimbeni leChiefs labezindaba.
“Ubunzima bamaqembu esidlale nawo busisizile ukuthi sizibone izinga esikulona ukuze sizoqinisa amabhawodi lapho kufanele khona.
“Kunezinto eziningi ezinhle esizibone ngeqembu kodwa zikhona nalezi okusafnele zilungiswe. Sizogxila kulokho kulesi sikhathi esisele ngaphambi kokuqala kwesizini entsha,” kuthembisa lo mdlali waseMgungundlovu.
UNgcobo umeme Amkhosi ukuba aphume ngobuningi bawo eMoses Mabhida ukuzozibonela ukuthi asehlangene kanjani.
“Konke lokhu Amakhosi abephupha ngakho kusukela ekutheni iqembu lidlale ingcwenga yebhola kuya ekutheni lingangenelwa amagoli bazokubona kwiChiefs ngoMgqibelo.
“Singabadlali sihlangene kakhulu kunakuqala ngakho-ke abalandeli abeze eMoses Mabhida ukuzizobonela iqembu labo libumbeka kabusha, liqala indlela ebheke lapho befisa libekhona.
“Sizolwa kwiToyota Cup siphinde siqhubeke ngomfutho ofanayo noma sekuqala isizini. Ngenxa yokwenzeke eNetherlands, siya kwiToyota Cup ngokuzethemba.
“Siyazi ukuthi ngeke ibelula iKotoko kodwa leli yithuba lethu lokubingelela abalandeli bethu osekunesikhathi bagcina ukusibonela eduze.
“Ngijabule ngendlela engifake ngayo isandla eqenjini. Ngiyafunda nsukuzonke. Akumina ngedwa kepha sonke siyakhula okuyizindaba ezimnandi eqenjini ngoba kusho ukuthi siya phambili,” kusho uNgcobo.