UKUSAYINISA abadlali abayisishiyagalombili kwe-Orlando Pirates kungenzeka kusho ukuphela kwendawo kwenqwaba ebilizwa ngendaba ijezi ngaphansi komqeqeshi, uJose Riveiro, ofulathele eZimnyama ngaphambi kokuphela kwesizini ka-2024/2025.
IPirates imemezele ukuthi isisayinise uYanela Mbuthuma (Richards Bay), Tshepang Moremi (AmaZulu), Sihle Nduli (Stellenbosch), Sinoxolo Kwayiba (Chippa United), Nkosikhona Ndaba (Richards Bay), Wasindi Nemtajela (Marumo Gallants) noTshepo Mashiloane (Baroka). Kwenzenza lokhu nje, eZimnyama zisanda kumemezela uSipho Mbule obebolekiswe yiMamelodi Sundowns kwiSekhukhune United.
Akubuzwa ukuthi ukufika kwala badlali kuzoshubisa umbango wejezi njengoba iPirates isanda kuqasha umqeqeshi, u-Abdeslam Ouaddou, onegcindezi yokuqhubeka nokufaka izindebe ekhabetheni. Ukusayina kukaNduli oyibamba enkabeni yenkundla, kuzoshubisa umbango kule ndawo eshaya ngabadlali okubalwa kubona uMakhehleni Makhaula, Thalente Mbatha, Goodman Mosele, Selaelo Rasebotja noSimphiwe Selepe. Makhulu amathuba okuthi uRasebotja adedelwe ngeZimnyama kwazise ungomunye wabadlali abebelizwa ngendaba ijezi. Omunye umdlali okubukeka ezulelwa ngamanqe nguNdabayithethwa Ndlondlo ngokusayina kukaKwayiba kwazise kule ndawo kukhona noKarim Kimvuidi noKabelo Dlamini.
Nokho okubhekwe kakhulu kwiPirates yisinqumo ngoZakhele Lepasa ophendulwe isibukeli kuleli qembu ngesizini edlule. Kubukeka ezothwala kanzima kulandela ukusayiniswa kukaMbuthuma ekubeni kusekhona u-Evidence Makgopa, Tshegofatso Mabasa noBoitumelo Radiopane abanga nabo ijezi. Enye indawo eshaya ngabadlali abaningi kodwa kwengezwa ngoMashiloane, isemuva kwesokudla ebangwa nguBandile Shandu, Deano van Rooyen, Thabiso Lebitso, Siyabonga Ndlozi.
EZimnyama zizoya ekhempini eSpain lapho zizolungiselela khona ukuqala kwesizini ka-2025/2026. Zizodlala neBolton Wanderers (Julayi 11), Pafos FC (Julayi 13), Las Palmas (Julayi 17, Granada (Julayi 19)
Related Topics: