UGumede kwabasayine kwiRichards Bay
UMICHAEL Gumede ubuyele emuva kwiRichards Bay FC ngemuva kokungavuselelwa kwenkontileka yakhe kwiLamontville Golden Arrows Isithombe: BACKPAGEPIX
UQOKE ukubuyela kwiRichards Bay FC umgadli, uMichael Gumede, okuvela ukuthi usehlukene neLamontville Golden Arrows.
Isolezwe lihoshe ukuthi inkontileka kaGumede ayivuselelwanga kuBafana Bes'thende okuyikhona okuphoqe ukuthi athungathe iqembu elisha azogijima kulona ngesizini ka-2022/2023 .
Ngomunye wabadlali okulindeleke ukuthi bethulwe yiBay esithangamini nabezindaba esizoba kusasa emini eGecko Inn, eRichards Bay.
Leli qembu lisayinisa abadlali elizoqinisa ngabo njengoba selizoyibamba kwiDStv Premiership. Babalelwa ku-10 abadlali okuthiwa bazokwethulwa yiNatal Rich Boyz okukhona kubona u-Abel Mabaso osuka kwi-Orlando Pirates. UGumede ubuyele kwiBay ayishiye ngo-2019 eyisithenjwa, eqhulula amagoli kwiGladAfrica Championship.
Izolo iPirates iqinisekise ukuthi uNkanyiso Zungu uzobolekiswa kwiBay isizini eyodwa. Leli qembu lithe omunye umdlali wayo uBongani Sam uzoya kwiMaritzburg United kuthi uBoitumelo Radiopane aye kwiCape Town Spurs.
"I-Arrows ayiyivuselelanga inkontileka kaGumede. Usephindele kwiRichards Bay. Ungomunye wabadlali abasha abazokwethulwa yiRichards Bay," kusho umthombo.
Imenenja yeBay, uJeffrey Fakude, yenqabile ukuphawula ngendaba yabadlali abasha, yathi bazomenyezelwa kusasa ngokusemthethweni.
Ngaphandle kukaGumede, kuvele ukuthi i-Arrows isihlukene nonozinti waseNamibia uMaximilan Mbaeva obelizwa ngendaba ijezi kuleli qembu.
Omunye osendleleni kuthiwa nguSiboniso Chonco. Kukhululwa abadlali kwi-Arrows nje, izolo imemezele ukuthi isiqashe ngokugcwele abaqeqeshi uMabhudi Khenyeza noVusumuzi Vilakazi.
Laba kade bebambile emuva kokukhonjwa indlela kukaLehlohonolo Seema. I-Arrows yenze izinguquko naseqenjini leDStv Diski Challenge ihlukana nomqeqeshi uSibongiseni Cele kulandela ukuthi leli qembu lehlulekile ukuzibekisela indawo kwiDStv Diski Shield ezoqala ngoJulayi 9. Isikhala sikaCele kuvela ukuthi sivalwe ngoJaphet Zwane owayengumdlali waBafana Bes'thende.
"Kuyiqiniso ukuthi sengihlukene ne-Arrows. Sihlale phansi nabaphathi savumelana ngokuthi ngishenxe. Hhayi kabi. Ngiyabonga kakhulu kwi-Arrows ngethuba enginike lona. Bekungokokuqala ukuthi leli qembu linikwe umqeqeshi osuka emazingeni aphansi njengami," kusho uCele.