UKHONJWE indlela kuMaZuu umqeqeshi uCavin Johnson ngemuva kokuqala isizini entsha ye-Absa Premiership kabi. Leli qembu ngoMsombuluko ntambama liveze ukuthi sekuphelile obekulihlanganisa nalo mqeqeshi ophikwa yimiphumela selokhu kuqale isizini.
Amazulu aqinisekise lezi zindaba ekhasini likaTwitter kwazise adonsa emsileni kwiPremiership njengoba esehlulwe kathathu, adlala ngokulingana kwemibili. Indaba yokuxoshwa kukaJohnston iqale yaphutshuzwa owayengumqeqeshi nomhlaziyi webhola uFaroouk Khan. AmaZulu adlale ngokulingana ngo 1-1 neGolden Arrows emdlalweni weligi ngoMgqibelo, okuwumphumela okubonakala ulole izembe labaphathi beqembu. UJohnson ubesenuka iqaqa kubalandeli beqembu njengoba bengazithandi ezinye zezinqumo azithathayo, abathi yizona eziholele ekutheni iqembu lidunguze emsileni.
UJohnson ubebekelwe umgomo wokuthola amaphuzu ayisithupha emdlalweni weLamontville Golden Arrows neKaizer Chiefs. Ukwabelana amaphuzu kulomdlalo kucacisile ukuthi uJohnson uzohluleka ukufinyelela esibalweni samaphuzu amathathu, okumenze wakhonjwa indlela.
%%%twitter https://twitter.com/hashtag/Usuthu_Pride?src=hash&ref_src=twsrc%5Etfw">#Usuthu_Pride pic.twitter.com/qDeQP5RV0b
— AmaZulu FC (@AmaZuluFootball)
%%%twitter https://twitter.com/hashtag/Usuthu_Pride?src=hash&ref_src=twsrc%5Etfw">#Usuthu_Pride
— AmaZulu FC (@AmaZuluFootball)
UJohnson uke wazivikela ngesonto eledlule njengoba walibeka ngebamba ukuthi akathengelwanga abadlali abadingayo, okuyikho okwenza iqembu libhinjelwe yizinto kwi-ABSA Premiership.
Ethimbeni labaqeqeshi abamataniswa netoho lokulolonga AmaZulu kukhona uLuc Eymael wayeqeqesha iFree State Stars noJozef Vurkuzic obeqesha iPolokwane City.