IPHOXILE iBafana iphuma zibekwa kwiCosafa Cup ishaywa yiBotswana emdlalweni we-quarter final izolo ntambama.
Ngesikhathi somdlalo amagoli eBafana avalelwe phakathi uLuther Singh noGrant Margeman ngesiwombe sokuqala. Awezivakashi ashaywe nguLebogang Ditsele noThatayaone Dithlokwe ngesiwombe sesibili.
Imizuzu eyishumi yokuqala kulo mdlalo akukho okungako okwenzekile njengoba amaqembu ebesafundana. Nokho isikhwishikhwishi seBafana uSingh besilithinta kuchwaze izihlwele ibhola njengoba kade sibhoke ngomjiko osheshayo oya phambili.
Ngomzuzu ka-13 osokhaya bathole ikhona, eshaywe uSingh yahlangana nekhanda likaKatlego Mohamme kodwa laphuma eceleni kwepali.
Ihambe phambili iBafana ngomzuzu ka-19, ngegoli layo leyo ndoda ebiwuhlupho uSingh. Uphaselwe ingcwenga yebhola nguTeboho Mokoena.
Ngomzuzu ka-24 uSingh ushaye i-free kick enhle kodwa yaphuma phezu kwepali, unozinti weBotswana * -Ezekiel Morake engazi nokuthi lidumephi.
Ishaye elesebili iBafana ngomzuzu ka-29, elibekwe enethini uGrant Margeman, ngemuva kokuphaselana okuhle kwi-18 yezitha noKamohelo Mahlatsi obezenzela ophikweni lwesokudla.
Izamile ukubuya emdlalweni iBotswana ngomzuzu ka-35, uJoel Mogorosi ungqofe ngekhanda ibhola eliyingozi ebeligotshwe uSegolane Boy kodwa unozinti weBafana uReyaad Pieterse walivimba.
Umdlali waseswini kwiBafana * -Athenkosi Dlala udlalise kabi umdlali weBotswana ngomzuzu ka-41, izivakashi zathola i-free kick endaweni eyingozi. UGilbert Baruti uhlulekile ukubhakhuzisa inethi, ibhola lakhe laphuma eceleni kwepali.
Okuhlalukile ngesiwombe sesibili wukuqina konyawo kwiBotswana ebingasafuni ukuthi iBafana izenzele ebholeni. Lokhu kwenze unompempe uCelso Alvacao waseMozambique, awumise njalo umdlalo. Izibuyisele emdlalweni iBotswana ngomzuzu ka-60, uDitsele engqofela phakathi ikhona ebishaywe uSegolame Boy.
Ngemuva kwaleli goli iBafana ididekile kancane, njengoba bese kugqame ukutatazela ibhola lingasahlali ezinyaweni.
Ngomzuzu wokugcina esikhathini esengeziwe umdlali weBotswana uDitlhokwe ushaye ngekhanda igoli lokulinganisa ngemuva kwebhola elishaywe uBoy.
Ngesikhathi sekukhahlelwa amaphenathi uMokoena ube neshwa eshweba iphenathi yokugcina evinjelwa uMorake.