AKAZIMISELE ngokushintsha indlela abadlala ngayo umqeqqeshi weBlack Leopards, uDylan Kerr, yize bezobhekana nelinye lamaqembu alwela ukuwina isicoco seligi emdlalweni wabo olandelyo we-Absa Premiership.
Okuhlupha uKerr nafuna ukukulungisa wukuthi iqembu lakhe lingenzi amaphutha afana neliwenze lidedela umdlalo lishaywa abakhaya iPolokwane City ngempelasonto.
ILeopards ebiwuphethe umdlalo iyona ehambe phambili kodwa yagcina iguqe ngo 3-1. Lo mphumela awumuhle kwiLidoda Duvha kwazise ibalwa namaqembu angahle azithole egawulwa yizembe uma eqhubeka nokulahla amaphuzu.
Ihleli endaweni ka-12 kwi-log ngamaphuzu awu-25. Ngaphansi kwayo kuhleli iChippa United, Baroka FC neFree State Stars bonke abangase bedlale eyokuhlunga ekupheleni kwesizini.
Kusasa izovakashela i-Orlando Pirates e-Orlando Stadium ngo-7.30 ebusuku.
IPirates nayo iyawadinga amaphuzu agcwele ukulula igebe esicongweni njengoba iqhwakele ngamaphuzu awu-44 kulandela ukuhlula iBidvest Wits ngo 1-0 ngempelasonto.
Ebuzwa uKerr ukuthi ngabe ucabanga ukuyishintsha yini indlela abadlala ngayo emdalweni wePirates, uthe: “Kulaba badlali enginabo kumele siligcine ibhola ikakhulukazi uma sidlala nala maqembu okuthiwa angcono. Indlela enhle yokuwabamba wukugcina ibhola kodwa uma ubanika ithuba kulona bazokujezisa njengoba kwenzekile namuhla (ngeSonto). Senze amaphutha, sithatha izinqumo ezingalungile uma siphasa ibhola. Manje sekumele ngibuyele emuva ngiyobuyekeza lapho senze khona amaphutha nokuthi ngabe ngibophele isikwati esifanele yini.”
Imidlalo ezayo yeLeopards ibukeka ingelula nokungayishovela ezansi uma iqhubeka nokulahla amaphuzu. Ngemuva kwePirates, izobhekana neChiefs, iBidvest Wits neMamelodi Sundowns bese ivala isizni naMaZulu FC.
“Imidlalo ezayo inzima. Sizodlala namaqembu amathathu abanga isicoco kodwa kumele sibhukule ngoba sisebenze kanzima ukufika kule ndawo esikuyona. Ngizokhuluma nabadlali bami ngibatshele ukuthi asikwazi ukulidedela leli thuba,” kusho lo mqeqeshi othathe izintambo kuJoel Masutha okhuphule iLeopards isuka kwiNational First Division ngesizini edlule.