IQHUBEKILE nokumangaza iNdebe yoMhlaba ka-2018 eseRussia njengoba eqhubeka amazwe athathwa njengamancane kunobhutshuzwayo nokuphoxa anedumela kulo mdlalo.
Izolo iColumbia eyaphuma kwi-quater final eBrazil ngo-2014, ishaywe yiJapan emdlalweni kaGroup H, eMordovia Arena.
Zibekwa nje ngomzuzu wesibili iColumbia yenze iphutha emuva, eliholele ekutheni uCarlos Sanchez athole ikhadi elibomvu ngemuva kokubamba ngesandla imbumbulu ebizobhajwa ezintanjeni ebishaywe uYuya Osaka.
Unondweba waseSlovenia, uDamir Skomina, akananazanga walikhomba emlotheni. UShinji Kagawa uyivalele phakathi leyo phenathi egcine ishaywe ngomzuzu wesithupha.
Ngomzuzu ka-30, umqeqeshi weColumbia, uJose Pekerman, wenze ushintsho wakhipha uJuan Cuadrado wafaka uWilmar Barros. Lolu shintsho ulwenziswe ukuthi ezakhe bese zishoda ngomuntu ozowina amabhola ngemuva kokukhishwa kukaSanchez ngekhadi elibomvu.
Iqalile yadlala kahle iColumbia nokuthe emizuzwini emithathu efakiwe, uFalcao wadlaliswa kabi uMaya Yoshida endaweni eyingozi. UJuan Quintero odlala ngonyawo lwesokunxele ushaye umshosha phansi wabhajwa ezintanjeni kwaba ngu 1-1 kwaze kwaphela isiwombe sokuqala.
Ngesiwombe sesibili kugadle iJapan kuqala ngomzuzu ka-53 ngesikhathi u-Osako ededela imbumbulu wala uDavid Ospina ezintini zeColumbia.
UPekerman ubonile ukuthi ilanga liyashona wafaka uJames Rodriguez owashaya amagoli ayisithupha kwiNdebe yoMhlaba eyayiseBrazil ngo-2014, wakhipha uQuintero.
Izinto ziqale ukonakalela iColumbia ngesikhathi kungena uKeisuke Honda ongene kwezwakala. Ngemuva kwemizuzu emine engenile uHonda, ulibambe ebhokisini wabuza unozinti u-Ospina ukuthi usekhona yini ezintini. U-Ospina ulivimbile kwadaleka ikhona. Kuleyo khona uYuya Osako ulingqofele phakathi ngekhanda, yahamba phambili okwesibili kulo mdlalo iJapan.
Izamile ukubuya iColombia, njengoba uRodriguez ehlulekile ukulibhajisa ezintanjeni ngomzuzu ka-77 ngemuva kokuphaselwa kahle ngesithende uJefferson Lerma. Nokho kube ukupaquza okungatheni njengoba iJapan iwathathe wonke amaphuzu.